ევროპული საქართველოს დეპუტატის, გიგა ბოკერიას განცხადებით, თბილისის მერის, კახა კალაძის კამპანია 3 კრიტიკული მედიის წინააღმდეგ გასაკვირი არ არის და ძალაუფლების დაკარგვის შიშითაა გამოწვეული. მისი თქმით, მმართველი გუნდი მსგავსი საქციელით აგრძელებს, "სიძულვილის თესვასა" და საზოგადოების გაყოფას.

"არ არის მოულოდნელი ეს. ძალაუფლების დაკარგვის შიშით არიან შეპყრობილი და ამის საფუძველი აქვთ, რადგან დაკარგავენ ძალაუფლებას შემდეგ არჩევნებში. ეს შიში უბიძგებთ მედიის მიმართ, რომელიც ვერ გააკონტროლეს ყველა მათი ძალადობრივი, უკანონო მცდელობის მიუხედავად. ეს იწვევს აგრესიას, იქ ხედავენ საფრთხეს და ბრიყვული მცდელობა აქვთ, რომ დისკრედიტაცია მოახინონ იმ საშუალებების, რომელსაც ვერ აკონტროლებენ", — განაცხადა მან.

გუშინ, 25 ივნისს თბილისის მერმა კახა კალაძემ თქვა, რომ ფეისბუქში გამოქვეყნებულ ანონსში მთავარი არხის, ფორმულასა და TV პირველის ლოგოები არა სისხლში "არამედ ტყუილებშია ჩაღვენთილი".

გუშინ, 25 ივნისს თბილისის მერმა განაცხადა, რომ ფეიკნიუსის წინააღმდეგ ვიდეოჩართვებს იწყებს. მისი თქმით, ყველას, ვინც მერიისა და მის წინააღმდეგ ცრუ ინფორმაციას ავრცელებს, "ცხვირ-პირში სიმართლის მუშტი მოხვდებათ".

როგორც კალაძე ამბობს, რადგან არჩევნები ახლოვდება, პოლიტიკოსებსა და მედიასაშუალებებში ცრუ და ცილისმწამებლური ინფორმაციის გავრცელებამ იმატა და სწორედ ამიტომ, აპირებს, რომ მათ "არგუმენტირებულად" და "რაციონალურად" უპასუხოს. მისი თქმით, ვიდეოჩართვებში მოსახლეობას აჩვენებენ, თუ როგორ ცდილობენ კონკრეტული მედიასაშუალებები საზოგადოების სიცრუეში შეყვანას.