პარლამენტის დამოუკიდებელი დეპუტატი და პარტია სამართლიანობისთვის თავმჯდომარე, ეკა ბესელია ითხოვს, რომ ნარკოდანაშაულში მსჯავრდებულთა ნაწილისთვის ამნისტია გამოცხადდეს. ამ თემაზე მან ბრიფინგზე 15 ივნისს ექნება.

როგორც პრესსამსახურის მიერ გავრცელებულ განცხადებაშია აღნიშნული, ნარკოპოლიტიკის რეფორმა დაგვიანდა და ამ დრომდე დაპირებული შეჯერებული საკანონმდებლო ცვლილებები ვერ განხორციელდა.

"მიუხედავად იმისა, რომ 2013 წლიდან ჯერ ამნისტიის აქტით, შემდგომ სასჯელთა შეკრების წესის გაუქმებით მოხდა ნარკომომხმარებლების დიდი ნაწილის გათავისუფლება, მაინც დარჩა საპატიმროში პატიმართა ის რაოდენობა, რომელიც უსამართლო გადაწყვეტილებების გამო იხდის სასჯელს.

საჭიროა საკანონმდებლო ცვლილებები საკონსტიტუციო სასამართლოს გადაწყვეტილებების შემდგომ. ამ ცვლილებების მიღებას ეს პარლამენტი აღარ აპირებს და სწორედ ამიტომ, ვაინიცირებთ ამნისტიის პროექტს, რათა უსამართლო სასჯელის მოხდისგან გათავისუფლდნენ ის პატიმრები, ვინც ამ დრომდე ელოდებოდა სამართლიან გადაწყვეტილებებს", — ნათქვამია განცხადებაში.

ეკა ბესელიას ამნისტიის პროექტის მიხედვით:

  • ის პირები, რომლებიც სასჯელს იხდიან ნარკოტიკული საშუალების შეძენის, შენახვის ან/და დამზადების ნიშნით კვალიფიცირებული დანაშაულისათვის გათავისუფლდებიან სისხლის სამართლის პასუხისმგებლობისაგან;
  • ის პირები, რომლებიც სასჯელს იხდიან ნარკოტიკული საშუალების ექიმის დანიშნულების გარეშე უკანონო მოხმარებისათვის გათავისუფლდებიან სისხლის სამართლის პასუხისმგებლობისაგან;
  • ის პირები, რომლებიც სასჯელს იხდიან მცენარე კანაფის ან მარიხუანის უკანონო შეძენა/ შენახვისათვის გათავისუფლდებიან სისხლის სამართლის პასუისმგებლობისაგან.

ამნისტიის პროექტის მიხედვით, სასჯელისაგან გათავისუფლებულ პირებს მოეხსნებათ ნასამართლობა. ასევე, აღსანიშნავია, რომ პირებს, რომელსაც შეეხება ამნისტიის მოქმედება აღუდგებათ ჩამორთმეული უფლებები.