იურიდიულ საკითხთა კომიტეტის თავმჯდომარე, ანრი ოხანაშვილი ამბობს, რომ საჯარო უწყებებში, მათ შორის პარლამენტში, კანონით არ აქვთ ვალდებულება, პირბადე ატარონ. ამისათვის მან საქართველოს მთავრობის 23 მაისის დადგენილება წარმოადგინა. მისი თქმით, დადგენილების მეხუთე მუხლის თანახმად, შეზღუდვა არ ვრცელდება სამედიცინო, საჯარო დაწესებულებებზე, თავდაცვის ძალებზე, სპეციალურ პენიტენციურ დაწესებულებასა და სამართალდამცავ ორგანოებში პირთა თავშეყრას, მათზე დაკისრებული ფუნქციების შესრულების მიზნით.

"არ არსებობს კანონისმიერი ვალდებულება, რომ პირბადეები აქ ვატაროთ. ჩვენ ვემორჩილებით რეკომენდაციებს და მაღალი პასუხისმგებლობით ვეკიდებით მათ. [...] ჩვენ გვაქვს ძალიან მაღალი პასუხისმგებლობა, უნდა ვიყოთ მაგალითი ჩვენი საზოგადოებისთვის. მიუხედავად იმისა, რომ კანონი ამას არ გვავალდებულებს, ვინაიდან ყოველდღიურად გავდივართ კონტროლს და ხდება სწრაფი რეაგირება, ჩვენ ვატარებთ პირბადეებს", — განმარტა ანრი ოხანაშვილმა 10 მაისის პლენარულ სხდომაზე. ამით მან დეპუტატ ნუკრი ქანთარიას კითხვას უპასუხა, არღვევდა თუ არა კანონს ის ვისაც პარლამენტში პირბადე არ ეკეთა.

"დახურული სივრცე რამდენჯერმე თქვით თქვენ, ამ დახურულ სივრცეში შედის ალბათ პარლამენტის სხდომათა დარბაზიც, არა? თუ შედის, მაშინ ჩვენ ალბათ დღეში ერთ 700 ლარს მაინც მოვაგროვებთ, იმიტომ რომ ზოგს გვიკეთია ნიღაბი, ხან არ გვიკეთია, გამოვდივართ ლაპარაკის დროს და ვიხსნით ნიღაბს, ახლა მე განგებ არ მოვიხსენი", — თქვა ქანთარიამ.

კანონპროექტის თანახმად, დახურულ საჯარო სივრცეში თავშეყრისას, პირბადის ტარების წესის დარღვევა გამოიწვევს ფიზიკური პირის დაჯარიმებას 20 ლარით, ხოლო იურიდიული პირის — 500 ლარით. ამასთან, პირბადის ტარება სავალდებულოა საზოგადოებრივი ტრანსპორტით გადაადგილების დროსაც.

გარდა ამისა, პროექტში გაწერილია ისიც, რომ ქორწილის, იუბილეს, ქელეხის და სხვა მასშტაბური ღონისძიებების გადახდის შემთხვევაში, ფიზიკური პირები 2 000 ლარით, ხოლო იურიდიული პირები 10 000 ლარით დაჯარიმდებიან.