ეროვნული ბანკი მოქალაქეებს აფრთხილებს, რომ კომპანია Mazilla.ge, შესაძლოა, თაღლითების მიერ იმართებოდეს. მათი თქმით, Mazilla.ge მომხმარებლებს სესხის აღებისთვის შუამავლობას სთავაზობს, თუმცა არ არის რეგისტრირებული, როგორც მიკროსაფინანსო ორგანიზაცია.

"მედიით გავრცელებული ინფორმაციით, ერთ-ერთი ორგანიზაცია, რომელიც მოსახლეობას სესხის აღებისათვის შუამავლობას სთავაზობს, შესაძლოა თაღლითების მიერ იმართებოდეს. საუბარია კომპანია Mazilla.ge - ზე, რომელიც ინფორმაციაში მოხსენიებულია, როგორც მიკროსაფინანსო ორგანიზაცია. Mazilla.ge არ წარმოადგენს საქართველოს ეროვნული ბანკის მიერ რეგისტრირებულ მიკროსაფინანსო ორგანიზაციას", — წერია განცხადებაში.

ვებგვერდზე დახასიათებაში წერია, რომ MAZILLA საქართველოში განვითარებადი ონლაინ სესხების ერთ-ერთი წარმომადგენელია, რომელიც თავის კლიენტებს სთავაზობს ფულის სესხების ძიების "მიმზიდველ პირობებს".

On.ge ცდილობს Mazilla.ge-ს წარმომადგენელთან დაკავშირებას და მათ პასუხს მიღებისთანავე შემოგთავაზებთ. ვებგვერდზე საკონტაქტოდ მითითებული ნომერზე რუსულენოვანი ავტომოპასუხე ირთვება, რომელიც მომხმარებელს ფინანსურ დახმარებას სთავაზობს. ოპერატორთან დაკავშრება ამ ეტაპზე ვერ ხერხდება.

გარდა ამისა, ეროვნული ბანკი კიდევ ერთხელ აფრთხილებს მოქალაქეებს, გამოიჩინონ განსაკუთრებული ყურადღება ფინანსური და პირადი მონაცემების ინტერნეტ სივრცეში გამოყენებისას. უწყების განცხადებით, ბოლო პერიოდში გახშირდა თაღლითების მიერ ყალბი ვებგვერდების საშუალებით ფინანსური ინსტიტუტების მომხმარებლების პირადი მონაცემების მოპარვის ფაქტები. მათი განმარტებით, საუბარია ისეთი მონაცემების მოპოვებაზე, რომელთა საშუალებით შესაძლებელია მომხმარებლის ფულად სახსრებზე წვდომის და ინტერნეტ-გადახდების განხორციელება.

"ასეთ მონაცემებს მიეკუთვნება საგადახდო ბარათის ნომერი და მისი უსაფრთხოების სამნიშნა კოდი, რომელიც დატანილია ბარათის მეორე გვერდზე, ასევე ინტერნეტ-ბანკის, მობილური ბანკის, ელექტრონული საფულის მომხმარებლის სახელი, პაროლი და უსაფრთხოების კოდი. აღნიშნული მონაცემების ხელში ჩაგდებით თაღლითები არასანქცირებულ გადარიცხვებს ახორციელებენ", — განმარტავენ ეროვნულ ბანკში.

ისინი მოუწოდებენ მოქალაქეებს, რომ გამოიჩინონ სიფრთხილე, განსაკუთრებით, თუ ეს საეჭვო ან გაურკვეველი რეპუტაციის ვებგვერდებზე პირადი და ფინანსური მონაცემების განთავსებას ეხება. დამატებითი შეკითხვების შემთხვევაში მოქალაქეებს შეუძლიათ დარეკონ ეროვნული ბანკის ცხელ ხაზზე — 2 406 406.