სავარაუდოდ, საქართველოს რკინიგზა, მუშაობას საქალაქთაშორისო ტრანსპორტთან ერთად, 8 ივნისს არ განაახლებს. როგორც On.ge-ს რკინიგზაში განუცხადეს, მათ ამ საკითხზე ზუსტი ინფორმაცია არ აქვთ და საკოორდინაციო საბჭოსგან შესაბამის მითითებებს ელოდებიან. მათივე თქმით, თეორიულად მგზავრთა გადაყვანის აღდგენისთვის მზად არიან.

ამასთანავე, მთავრობის 23 მაისის დადგენილებაში შევიდა ცვლილებები, რომელიც 8 ივნისიდან უნდა ამოქმედდეს. ცვლილებებში არ მომხდარა სარკინიგზო გზით მგზავრთა გადაყვანის აღდგენა.

"ჩერდება სარკინიგზო ტრანსპორტით მგზავრთა გადაყვანა, გარდა სამომსახურეო სარკინიგზო მიმოსვლისა, რომლის ფარგლებში სატვირთო გადაზიდვების შეუფერხებლად წარმოების მიზნით ხდება სს საქართველოს რკინიგზის მიერ შემუშავებული გრაფიკით თანამშრომლების გადაადგილება/გადაყვანა საცხოვრებელი ადგილიდან სამუშაო ადგილამდე და პირიქით, საქართველოში ახალი კორონავირუსის გავრცელების აღკვეთის მიზნით შექმნილ უწყებათაშორის საბჭოსთან არსებულ ოპერაციულ შტაბთან (შემდგომში – ოპერაციული შტაბი) შეთანხმებით", — წერია დადგენილებაში.

საქართველოს რკინიგზამ მუშაობა კორონავირუსის პანდემიის გამო 31 მარტს შეაჩერა, როცა საქალაქთაშორისო ტრანსპორტი აიკრძალა. 8 ივნისიდან კი საკოორდინაციო საბჭოს გადაწყვეტილებით საქალაქთაშორისო ტრანსპორტის მოძრაობა ისევ აღდგება.