Freedom House თავის ბოლო ანგარიშში (Dropping the Democratic Facade / "დემოკრატიის ფასადის ჩამოგდება") წერს, რომ საქართველოში პროპორციული საარჩევნო სისტემის შემოღებით ქართული ოცნების არჩევნებში კიდევ ერთხელ გამარჯვების შანსი მცირდებოდა:

"2020 წლის თებერვალში ოპოზიციონერმა პარტიებმა პარლამენტი მას შემდეგ დატოვეს, რაც მთავრობამ სრულად პროპორციულ საარჩევნო სისტემაზე დანაპირები არ შეასრულა. ამის შემოღების შემთხვევაში არჩევნებში ქართული ოცნების გამარჯვების შანსი მცირდებოდა. კრიზისი მარტში, დიპლომატების ჩართვის შემდეგ შემსუბუქდა".

ანგარიშის თანახმად, საქართველო ისევ ჰიბრიდული დემოკრატიის ქვეყანაა, თუმცა შარშანდელთან შედარებით დემოკრატიის განმსაზღვრელი ქულა, 3,29-დან 3,25-მდე შემცირდა. ანგარიშში წერია, რომ კლება სასამართლოს დამოუკიდებლობის სფეროს უკავშირდება:

"[საქართველოში] სასამართლოს დამოუკიდებლობის ქულა შემცირდა 3-დან 2,75-მდე, უზენაეს სასამართლოში ახალი მოსამართლეების სადავო დანიშვნისა და 2019 წლის ივნისის აქციების დასაშლელად პოლიციიის მიერ ძალის არაპროპორციულად გამოყენების გამო".