საქართველოს უზენაეს სასამართლოში დღეს იწყება რუსთავი 2-ის საქმის განხილვა ზეპირი მოსმენის გარეშე. ეს ნიშნავს, რომ პროცესი არ იქნება ღია, მას არ დაესწრებიან მხარეთა წარმომადგენლები.

ტელეკომპანიის იურისტებმა რუსთავი 2-ის ეთერში განაცხადეს, რომ სასამართლო დღეს პოლიტიკური გავლენის ქვეშაა, წინააღმდეგ შემთხვევაში კი საქმე მათ სასარგებლოდ დასრულდებოდა. ისინი უზენაესი სასამართლოსგან, მაღალი საზოგადოებრივი ინტერესიდან გამომდინარე, განხილვის ღიად ჩატარებას მოითხოვდნენ, თუმცა მათი მოთხოვნა არ დაკმაყოფილდა.

ძმები ყარამანიშვილები უზენაესი სასამართლოსგან სააპელაციო სასამართლოს გადაწყვეტილების გაუქმებას მოითხოვენ.

თბილისის სააპელაციო სასამართლომ 2016 წლის 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით. სააპელაციო სასამართლოში საქმე მოსამართლეთა კოლეგიამ განიხილა, რომლის შემადგენლობაშიც იყვნენ მოსამართლეები ნათია გუჯაბიძე, ნატა ნაზღაიძე და შორენა ყავლაშვილი.

უზენაესი სასამართლოს გადაწყვეტილება საბოლოო იქნება.