ბელარუსის პრეზიდენტი ალექსანდრ ლუკაშენკო ამტკიცებს, რომ პანდემიის მიუხედავად 9 მაისის სამხედრო აღლუმის გაუქმება არ შეუძლია. მისი თქმით, ათასობით ადამიანი ელოდება, რომ ღონისძიება ჩატარდეს.

ლუკაშენკო ამბობს, რომ ამ გადაწყვეტილებაზე დიდი ხანი იფიქრა, თუმცა მეორე მსოფლიო ომის ვეტერანებმა ითხოვეს, რომ ღონისძიებაზე მიიყვანონ. მას არ სურს, ვეტერანებმა იფიქრონ, რომ მთავრობას "პანდემიის შეეშინდა".

"უნდა გვახსოვდეს, რომ ეს ხალხი კვდებოდა, შეიძლება ვირუსების და სხვა დაავადებების გამოც. მაგრამ ისინი ამას ვერ გრძნობდნენ და ამაზე არც ფიქრობდნენ. რამდენად პათოსურადაც არ უნდა ჟღერდეს, ისინი ჩვენ გამო კვდებოდნენ. და დაფიქრდით, რას იტყვის ხალხი", — განაცხადა ლუკაშენკომ.

9 მაისის სამხედრო აღლუმის გაუქმების მოთხოვნით ბელარუსში პეტიციაც გაკეთდა. თავდაცვის სამინისტროში ამტკიცებენ, რომ ღონისძიებისთვის ხელსაყრელი ეპიდემიოლოგიური სიტუაციაა, ამავე დროს აღლუმი არმიის მომზადების მნიშვნელოვანი ნაწილია და მისი გაუქმება შეუძლებელია.

ბელარუსის ხელისუფლების მიერ გავრცელებული მონაცემებით, ქვეყანაში კორონავირუსის 15 ათასზე მეტი შემთხვევაა გამოვლენილი. პანდემიის დაწყების დღიდან კი 97 ადამიანი გარდაიცვალა.