თურქეთის პრემიერმინისტრი, რეჯეპ ტაიპ ერდოღანი მიიჩნევს, რომ ევროკავშირი არ არის ერთადერთი ალტერნატივა თურქეთისათვის. როგორც თურქული მედიასაშუალებები წერენ, ამის შესახებ ერდოღანმა ადგილობრივ მედიასთან შეხვედრისას, დღეს განაცხადა.

ერდოღანმა ევროკავშირის უპერსპექტივობაზე გაამახვილა ყურადღება:

"ბრექსიტის შემდეგ მსგავსი რამ ევროპის სხვა ქვეყნებშიც შეიძლება მოხდეს. საფრანგეთსა და იტალიაში უკვე საუბრობენ ამის შესახებ. მე ვამბობ, რატომ არ უნდა დაიკავოს თურქეთმა ადგილი "შანხაის ექვსეულში"?

ერდოღანი გულისხმობს შანხაის თანამშრომლობის ორგანიზაციაში თურქეთის გაწევრიანების შესაძლებლობაზე. ამ ორგანიზაციის წევრები არიან ჩინეთი, რუსეთი, ყაზახეთი, ყირგიზეთი, ტაჯიკეთი და უზბეკეთი. ორგანიზაციაში დამკვირვებლის სტატუსი აქვთ ავღანეთს, მონღოლეთს, ინდოეთს, ირანს, პაკისტანსა და ბელორუსს. შანხაის თანამშრომლობის ორგანიზაციაში შესვლის პროცედურები დაწყებული აქვთ ინდოეთსა და პაკისტანს.

ერდოღანის თქმით, შანხაის თანამშრომლობის ორგანიზაციაში გაერთიანების შესაძლებლობაზე ის მოლაპარაკებას გამართავს რუსეთის პრეზიდენტთან. ერდოღანის მოსკოვში ვიზიტი უკვე დაგეგმილია.

როგორც თურქეთის პრეზიდენტი ამბობს, ევროკავშირი უკვე 53 წელია აჭიანურებს გაერთიანებაში თურქეთის მიღებას, ახალ გაერთიანებაში შესვლა და თურქეთისთვის სარგებლის მომტანი იქნება და ეს ქვეყანას მოქმედების უფრო მეტ თავისუფლებას მისცემს.

მას შემდეგ, რაც 2016 წლის ივლისში თურქეთში ამბოხი ჩაიშალა, ერდოღანმა 100 ათასზე მეტი თანამდებობის პირი, მათ შორის მოსამართლეები, სამხედროები, პოლიციელები, პროკურორები, ჟურნალისტები, ან სამსახურიდან გაათავისუფლა, ან დააპატიმრა. აღნიშნულის გამო თურქეთმა ევროკავშირის კრიტიკა დაიმსახურა, რაც ერდოღანისთვის მიუღებელი აღმოჩნდა.