პირველიდან მე-6 კლასის ჩათვლით მოსწავლეებისთვის სასკოლო ფორმების ესკიზები ცნობილია — ინფორმაციას IPN ავრცელებს.

ზოგადი განათლების შესახებ კანონში შეტანილი ცვლილებების მიხედვით, 2026 წლის სასწავლო წლიდან I-VI კლასებში სასკოლო ფორმა სავალდებულო გახდება. IPN-ის ინფორმაციით, 2026–2027 სასწავლო წლისთვის დაწყებითი საფეხურის მოსწავლეების სასკოლო ფორმებისთვის განათლების სამინისტრომ ბაზრის კვლევა გამოაცხადა.

ფოტო: IPN

ოფიციალური დოკუმენტიდან ირკვევა, რომ სამინისტროს ბაზრის კვლევა გამოცხადებული აქვს კოსტიუმებისთვის, ქვედატანებისა და შარვლებისთვის.

სატენდერო დოკუმენტის მიხედვით, 292 ათასი გოგონას პიჯაკის, 308 ათასი ბიჭის პიჯაკის, 438 ათასი გოგონას შარვლის, 616 ათასი ბიჭის შარვლის, 146 ათასი მუხლამდე ქვედაკაბის და 1000 გრძელი ქვედაკაბის შესყიდვა მოხდება.

ცნობისთვის, მიქანაძის განმარტებით, სოციალურად დაუცვლი ოჯახები სასკოლო ფორმაზე სახელმწიფოსგან "მხარდაჭერას მიიღებენ".

"ჩვენ შევისწავლეთ სკოლებში არსებული პრაქტიკა და მივიღეთ გადაწყვეტილება ტესტურ რეჟიმში, რომ შემდეგი სასწავლო წლიდან ყველა საჯარო სკოლაში, პირველიდან მეექვსე კლასის ჩათვლით, დაწყებით ეტაპზე, სავალდებულოდ ბრუნდება სასკოლო ფორმები.

ამასთანავე, ჩვენ, რა თქმა უნდა, ვითვალისწინებთ სოციალურად დაუცველ ოჯახებს და ყველა ის ოჯახი, რომელიც ჯანდაცვის სამინისტროს მიერ შეფასებული არის 60 000 ქულით, ან უფრო ნაკლებით, სახელმწიფოს მხრიდან შესაბამის მხარდაჭერას მიღებს ფორმებთან დაკავშირებით," — თქვა მიქანაძემ.