ენმ: გავაკეთებთ ყველაფერს, რომ მინიმალური ზიანი მიადგეს ქვეყანას ქართული ოცნების საკონსტიტუციო უმრავლესობით

"გავაკეთებთ ყველაფერს, რომ მინიმალური ზიანი მიადგეს ქვეყანას ქართული ოცნების საკონსტიტუციო უმრავლესობით"; "უნდა შევაჩეროთ ბიძინა ივანიშვილის გადაჭარბებული ძალაუფლება" - ეს განცხადებები მე-9 მოწვევის პარლამენტის პირველი სხდომის გახსნამდე ერთიანი ნაციონალური მოძრაობის წევრებმა მედიასთან გააკეთეს:

გიგა ბოკერია:

"ივანიშვილის უმრავლესობა პარლამენტში, სამწუხაროდ, არ იძლევა არანაირი სერიოზული ოპტიმიზმის საფუძველს ჩვენთვის, ჩვენი საზოგადოებისთვის. ქვეყანაში იზრდება სიღარიბე, კრიმინალი, კორუფცია, ეკონომიკა არ იზრდება, ეს არის სერიოზული კრიზისი და ეს უმრავლესობა ამ კრიზისზე პასუხისთვის, ჩემი აზრით, მზად არ არის, ნამდვილად. ჩვენი ვალია, საზოგადოების მთლიანად და ამ შემთხვევაში ჩვენი ოპოზიციის აქ პარლამენტში და პარლამენტის გარეთ, რომ ყველაფერი გავაკეთოთ, რომ მინიმუმ ნაკლები ზიანი მივაყენებინოთ ივანიშვილს და მის გუნდს ჩვენი ქვეყნისთვის. ჩვენ ამისთვის ყველა ლეგიტიმურ, კონსტიტუციურ, დემოკრატიულ მეთოდს მივმართავთ პარლამენტში."

ელენე ხოშტარია:

"ძალიან უსამართლო საარჩევნო ბრძოლის შემდეგ ჩვენ დღეს ვიწყებთ საპარლამენტო ბრძოლას. მიგვაჩნია, რომ ეს არის დღეს საქართველოს ინტერესებში, ეს არის ჩვენი ამომრჩევლის, ჩვენი მხარდამჭერების ინტერესებში, რომლებმაც ჩვენ გამოგვიცხადეს ნდობა. ჩვენ, ბუნებრივია, ვაჩვენეთ ყველას, რომ ჩვენ გვქონდა ერთადერთი, მშვიდობიანი საარჩევნო გზა და ყველა ბრალდება რაღაც აპოკალიფსის და გადატრიალების შესახებ იყო, ცხადია, აბსოლუტურად აბსურდული და ხელისუფლების შეთითხნილი. ცხადია, ჩვენ გავაკეთებთ ყველაფერს, საპარლამენტო გზით, რომ მინიმალური ზიანი მიადგეს ქვეყანას ქართული ოცნების საკონსტიტუციო უმრავლესობით."

სერგი კაპანაძე:

"ეს ხელისუფლება და ეს საპარლამენტო შემადგენლობა ქართული ოცნების, არ იქნება ხალხის ინტერესების წარმომადგენელი და აუცილებლად დასჭირდებათ ისეთი დეპუტატები საქართველოს მოსახლეობას, რომლებიც რეალურ პრობლემებზე ისაუბრებენ და არამარტო ერთი ადამიანის ჭკუაზე ივლიან."

სერგო რატიანი:

"ამ მოწვევის პარლამენტს აქვს სერიოზული გამოწვევები, ჩვენს ქვეყანას აქვს სერიოზული გამოწვევები. ქვეყნის ეკონომიკა არის ჩამოშლის პირას, საკმაოდ სერიოზული პრობლემები არის სხვადასხვა, კრიმინალის, ასევე კორუფციის მიმართულებით. ამის წინააღმდეგ მოგვიწევს ჩვენ ბრძოლა და ეს უნდა იყოს შეჩერებული. გარდა ამისა, უნდა შევაჩეროთ ბიძინა ივანიშვილის გადაჭარბებული ძალაუფლება."

ბოლო ამბები:

გირჩევთ