სადაზღვევო კომპანია ალდაგმა ციფრული ტრანსფორმაციის ლაბორატორია შექმნა, რომლის ფარგლებშიც კლიენტ კომპანიებს ონლაინ მაღაზიების შექმნაში დაეხმარება.

ამისათვის ალდაგმა თანამშრომლობა დაიწყო კონსულტანტთა ჯგუფთან, რომელიც კომპანიებს კოორდინაციას გაუწევენ იმისათვის, რომ მათ მოკლე დროში მოახერხონ ონლაინ მაღაზიების პლატფორმების შექმნა და ონლაინ ოპერირების დაწყება. ელექტრონული კომერციის სპეციალისტები დაეხმარებიან ორგანიზაციებს მიიღონ ოპტიმალური შეთავაზება, რომელიც მათ საჭიროებებზე იქნება მორგებული.

სერვისი ორეტაპიანია და მოიცავს, პირველ ეტაპზე, პროფესიონალების კონსულტაციას და ბიზნესზე მორგებული გადაწყვეტის შეთავაზებას და მეორე ეტაპზე, კლიენტის სურვილის შემთხვევაში, პროცესის მართვას მაღაზიის აწყობამდე. სერვისი ხელმისაწვდომია ალდაგის როგორც არსებული, ისე პოტენციური მომხმარებლებისთვის.

"ჩვენ გვესმის, რომ სიტუაციიდან გამომდინარე საცალო ვაჭრობის ობიექტებს გაუჭირდებათ ოპერირება, თუკი მზად არ აღმოჩნდებიან ახალი რეალობის მისაღებად. ამისათვის, ჩვენ, როგორც მათი მზღვეველი და პარტნიორი კომპანია, მზად ვართ ვიზრუნოთ ამ კომპანიებზე ჩვენი რესურსების ფარგლებში და დავეხმაროთ მათ ბიზნესის უწყვეტობის შენარჩუნებაში", — აცხადებენ ალდაგში.