IT მენეჯერი, გიორგი გიორგაძე თბილისში მომუშავე სამედიცინო პერსონალს უფასო მგზავრობას სთავაზობს. ამის შესახებ მან თავდაპირველად ფეისბუქის საკუთარ გვერდზე დაწერა.

გიორგი On.ge-სთან ამბობს, რომ შეუძლია ექიმებს და საავადმყოფოებში დასაქმებულ სხვა ადამიანებს გადაადგილებაში დილის 09:00 საათიდან შუადღის 12:00 საათამდე დაეხმაროს.

ამ ინიციატივით სამედიცინო სფეროს წარმომადგენლების მიმართ პატივისცემის გამოხატვა სურს. მისი თქმით, დღევანდელმა რეალობამ ყველას დაანახა, რომ ექიმები ერთ-ერთი ყველაზე მნიშვნელოვანი და საჭირო სფეროს წარმომადგენლები არიან.

"მართლა არ იქნება ჩემთვის პრობლემა ამის გაკეთება და თუ ვინმეს რამე სახით შეუმსუბუქდება ხარჯები და წაადგება, რატომაც არა. ვისაც დრო აქვს და მანქანა ჰყავს, ნებისმიერს შეუძლია გააკეთოს, არაფერი განსაკუთრებული არაა მგონი. დღევანდელი სიტუაციიდან გამომდინარე, ერთ-ერთი ყველაზე მნიშვნელოვანია, რომ სამედიცინო სფეროს წარმომადგენლებს მაქსიმალურად ამოვუდგეთ გვერდში ყველანი", — ამბობს გიორგი.

გიორგი აღნიშნავს, რომ კარანტის რეჟიმის დარღვევის გარეშე, ერთდროულად მაქსიმუმ ორ მგზავრს გადაიყვანს. ის აპირებს დრო ისე გადაანაწილოს, რომ რამდენიმე მარშრუტის დაგეგმვა მოასწროს, 12:00 საათიდან კი მისი სამუშაო იწყება.

უფასოდ გადაადგილების მსურველ სამედიცინო პერსონალს გიორგისთან დაკავშირება ფეისბუქის საშუალებით შეუძლია. მისი თქმით, ამ მომენტისთვის უკვე ერთი ადამიანი შეეხმიანა და ხუთ და 9 აპრილს მანქანაში ერთი ადგილი დაჯავშნა.