საქართველოს პრემიერ-მინისტრის პრესსპიკერის ინფორმაციით, მარნეულისა და ბოლნისის მუნიციპალიტეტების სრული უზრუნველყოფა ეკონომიკისა და სოფლის მეურნეობის მინისტრებს დაევალათ.

"აბსოლუტურად ყველა საჭიროება იქნება შესაბამისად მიწოდებული. შესაძლოა, იყოს გარკვეული საკითხები, რომლებიც ჯერ კიდევ საჭიროებს გადაწყვეტილებას და დღის განმავლობაში ეს ყველაფერი მოგვარდება, თუმცა, საერთო ჯამში ადგილზე სიტუაცია არის დამაკმაყოფილებელი", - თქვა ირაკლი ჩიქოვანმა.

მისივე ინფორმაციით, მარნეულსა და ბოლნისში დღეის მდგომარეობით მოქმედებს მხოლოდ ის ობიექტები, რომლებიც აუცილებელია, რათა მოქალაქეებს ჰქონდეთ წვდომა როგორც სურსათზე, ასევე, სამედიცინო, სააფთიაქო და საბანკო სერვისებზე.

ამასთან, ირაკლი ჩიქოვანმა თქვა, რომ ეკონომიკისა და სოფლის მეურნეობის სამინისტროს დავალებული აქვთ ამ ორი მუნიციპალიტეტის ტერიტორიაზე იმ საწარმოთა ჩამონათვალის გაკეთება, რომლებიც აგრძელებენ მუშაობას, თუმცა, ეს მუშაობა გაგრძელდება მკაცრად გაწერილი პროტოკოლით და დაცული იქნება ყველა რეგულაცია.