სამხრეთ კორეაში კორონავირუსის გავრცელებასთან დაკავშირებული რელიგიური ორგანიზაციის ლიდერმა ქვეყანას ბოდიში მოუხადა. აღნიშნულ ორგანიზაციას შემთხვევების 60 პროცენტი უკავშირდება.

სინჩხონჯის იესოს ეკლესიის ლიდერმა, ლი მენ ჰიმ პრესკონფერენციაზე დაიჩოქა და ბოდიში მოიხადა.

"მიუხედავად იმისა, რომ ეს არ ყოფილა მიზანმიმართული, ბევრი ადამიანი დაინფიცირდა. ყველაფერი ვცადეთ, თუმცა ამის შეჩერება ვერ შევძელით", — განაცხადა ლიმ.

BBC-ის ინფორმაციით, ვარაუდობენ, რომ რელიგიური ორგანიზაციის წევრებმა ჯერ ერთმანეთი დააინფიცირეს და შემდეგ ქვეყანაში მოგზაურობისას გაავრცელეს. გარდა ამისა, ჯგუფს ადანაშაულებენ იმაშიც, რომ ისინი თავიანთი წევრების სახელებს მალავენ, რაც გამოძიებას კიდევ უფრო მეტად აძნელებს.

ბოლო მონაცემებით კორონავირუსით დაინფიცირების 89 254 შემთხვევა გამოვლინდა. ახალი ვირუსის შედეგად კი სულ 3 058 გარდაიცვალა. გარდა ამისა, 45 221 ადამიანი გამოჯანმრთელდა.

COVID-19 ყველაზე მაღალი მაჩვენებელი ჩინეთშია, სადაც ვირუსი 80 026 ადამიანს გამოუვლინდა. მაღალი რისკის ქვეყნებში ასევე შედიან სამხრეთ კორეა, იტალია და ირანი.