აჭარის მაუწყებლის საინფორმაციო სამსახურის უფროსის მოადგილე და რვა საათიანი გამოშვების ყოფილი რედაქტორი, მაია მერკვილაძე მაუწყებელში რჩება. როგორც მან On.ge-ს უთხრა, ის ახალი ტოკ-შოუს პროდიუსერი და რადიოს საინფორმაციო გამოშვების რედაქტორი იქნება.

მერკვილაძის თქმით, წასვლა გამოსავალი არ იყო და დარჩენის გადაწყვეტილებაც კოლეგებთან კონსულტაციის შემდეგ მიიღო:

"ჩემი კოლეგები და მეგობრები თვლიან, რომ მაუწყებელში ვინც ტოვებს თანამდებობას, ის ათავისუფლებს ადგილს ახალი კადრისთვის, რომელიც შეცვლის იმ პოლიტიკას, რომელიც არის დღეს. რა პოზიციაც არ უნდა ყოფილიყო, ნებისმიერი პოზიციიდან მე შემიძლია გავაკეთო, ამგვარ".

მაია მერკვილაძე ამბობს, რომ დარჩენის პარალელურად ალტერნატიული პროფკავშირი გაფიცვისთვის მომზადებას განაგრძობს:

"დაგეგმილია მომზადება საგაფიცვო კომიტეტის მოთხოვნების. ამავე დროს, იმგვარად წარმართვა ამ საგაფიცვო მოვლენების, რომ არ შეექმნას საფრთხე არც ერთ დასაქმებულს და არ შეექმნას საფრთხე თავად მაუწყებელს. ჩვენ არ ვუცხადებთ პროტესტს საზოგადოებას, ჩვენ პროტესტს ვუცხადებთ არსებულ მენეჯმენტს".

24 თებერვალს ცნობილი გახდა, რომ მაია მერკვილაძის ნაცვლად რვასაათიანი საინფორმაციო გამოშვების რედაქტორი ნინო ხაჟომია იქნება.

ხაჟომიას დანიშვნასთან დაკავშირებით დირექტორის, გიორგი კოხრეიძის გადაწყვეტილება აჭარის მაუწყებლის თანამშრომლებმა გააპროტესტეს. მაუწყებლის ალტერნატიულმა პროფკავშირებმა კი განაცხადეს, რომ გაფიცვისთვის მზადებას იწყებენ.