ჩინური ბანკები ამიერიდან ახალ წესებს უნდა დაემორჩილონ: მათ ნაღდი ფულის დეზინფექცია ულტრაიისფერი სხივებითა და მაღალი ტემპერატურით უნდა მოახდინონ, შემდეგ კი ბანკნოტები 7-14 დღის განმავლობაში უნდა შეინახონ, სანამ ბრუნვაში თავიდან ჩაუშვებენ. ცენტრალური ჩინეთის მთავრობამ ამის შესახებ ინფორმაცია რამდენიმე დღის წინ გაავრცელა.

ამ ახალმა ზომებმა კორონავირუსის გავრცელებას ხელი უნდა შეუშალოს. მსოფლიო ჯანდაცვის ორგანიზაციის განცხადებით, კორონავირუსი, რომელსაც Covid-19 უწოდეს, მყარ ზედაპირზე რამდენიმე საათის განმავლობაში ცოცხლობს. ამის გამო საფრთხის შემცველ ტერიტორიებზე ლიფტის ღილაკებს, კარის სახელურებს და საერთო სივრცეს გამუდმებით უკეთებენ დეზინფექციას. შესაბამისად, უფრო და უფრო მეტი მოქალაქე ღელავს ნაღდ ფულზე, რომელიც ხელიდან ხელში გადადის.

ნაღდი ფული, რომელიც საავადმყოფოებიდან ან ბაზრობიდან მოდის, გაწმენდას არ ექვემდებარება. მას ცენტრალური ბანკი ანადგურებს.

იმისთვის, რომ ფულის დეფიციტი არ შეიქმნას, ბანკი ახალ, "სუფთა" ბანკნოტებს გამოუშვებს. მხოლოდ იანვარში 4 მილიარდი იენის, ანუ $573 000-ის ეკვივალენტი ბანკნოტები დაიბეჭდა უხანისთვის. მთავრობა ცდილობს, მინიმუმამდე დაიყვანოს ნაღდი ოპერაციები და მოქალაქეებს ციფრული ანგარიშსწორებისკენ მოუწოდებს.

უცნობია, რეალურად რამდენად საშიშია "ინფიცირებული" ფული - ვირუსი რამდენიმე საათის შემდეგ კვდება, დეზინფექცია კი სავსებით საკმარისი უნდა იყოს, თუმცა, როგორც ჩანს, ჩინეთს გარისკვა არ სურს.

2017 წელს ჩატარებული კვლევის თანახმად, ნაღდი ფული ძალიან ბინძურია. თითოეული ბანკნოტი შეიცავს იმ გარემოს ნაწილაკებს, სადაც მანამდე იყო და ეს ნაწილაკები ადამიანებიდან ადამიანებს გადაეცემა.

მაგალითად, დოლარის კუპიურებზე შეგიძლიათ ნახოთ ცხოველების დნმ, ნარკოტიკების კვალი, ასობით სახეობის ბაქტერია და ვირუსები. ფულზე დაკვირვებით იმის გაგებაც კი შეიძლება, რომელ რეგიონში უმეტესად რა ტიპის საკვებს ჭამენ.

კორონავირუსით დაავადებულთა რიცხვი ამჟამად 71 000-ს აღწევს, დაღუპულია 1 775 ადამიანი