მეცნიერებათა ეროვნული აკადემიის ფეისბუქგვერდზე ბიძინა ივანიშვილისადმი დაბადების დღის მისალოცი ტექსტი აღარ იძებნება. აკადემიაში ამბობენ, რომ იგი დირექტორის დავალებით, გინებების გამო წაიშალა.

"ეს ტექსტი რომ დავდე, აკადემიაში უცებ გაითიშა ინტერნეტი. მე რა მექნა, მითხრეს დადეო და დავდე, მერე წავედი სახლში... საიტის ადმინისტრატორმა დამირეკა, დირექტორმა [გიორგი კვესიტაძემ] თქვა, სასწრაფოდ წაშალეთო. მიზეზი ისაა, რომ უკანასკნელი დედის გინებები იყო", — უთხრა On.ge-ს აკადემიის საზოგადოებასთან ურთიერთობის სამსახურის მთავარმა სპეციალისტმა, ნათია ვადაჭკორიამ.

დღეს, 18 თებერვალს ქართული ოცნების თავმჯდომარეს, ბიძინა ივანიშვილს დაბადების დღე საქართველოს მეცნიერებათა ეროვნულმა აკადემიამ ფეისბუქპოსტით მიულოცა. მისალოც წერილში ეწერა, რომ ივანიშვილს ქართულ აკადემიებში "მარადიული მადლიერება აქვს დათესილი".

"ძვირფასო ბატონო ბიძინა, გულწრფელად გილოცავთ დაბადების დღეს. თქვენ თავად მეცნიერს, დიდი ამაგი გაქვთ ქართული მეცნიერების განვითარების საქმეში. მარადიული მადლიერება გაქვთ დათესილი ქართულ აკადემიებში. თავის მხრივ მეცნიერებათა ეროვნული აკადემია დიდად აფასებს თქვენ ღვაწლს ქართული სახელმწიფოებრიობის განმტკიცებაში, ადამიანთა კეთილდღეობისათვის ზრუნვაში. გისურვებთ ჯანმრთელობასა და მრავალჟამიერ სიცოცხლეს ჩვენი ქვეყნის და ჩვენი ხალხის საკეთილდღეოდ", — ეწერა მისალოც ტექსტში.