ქართული ოცნების გენერალური მდივანი და თბილისის მერი, კახა კალაძე აცხადებს, რომ ევროპარლამენტარებს ზედაპირული განცხადებები ჰქონდათ და ბევრ საკითხზე ცალმხრივ ინფორმაციას ფლობდნენ. ამის შესახებ კალაძემ გადაცემა კვირის თემაში ისაუბრა.

თბილისის მერს ჰკითხეს, რას აპირებდა ქართული ოცნება მას შემდეგ, რაც ევროპარლამენტში ერთობლივი რეზოლუცია ჩავარდა და მმართველი გუნდი კრიტიკის ობიექტი გახდა.

"ნაბიჯების გადადგმას რაც შეეხება, ეს არის უფრო ხშირი კომუნიკაცია ამ ადამიანებთან [ევროპარლამენტარებთან]. იმიტომ, რომ განცხადებები, რასაც ჩვენ ვისმენდით, ეს არის ზედაპირული განცხადებები. ჩვენ ძალიან ბევრი შეხვედრა გავმართეთ და ეს იყო ერთი თვი დაგეგმილი შეხვედრები. ამ ადამიანებს ბევრ საკითხში ჰქონდათ არასწორი ინფორმაცია, ცალმხრივად მიღებული ინფორმაციები, რაც ძალიან ცუდია", — განაცხადა კახა კალაძემ.

13 თებერვალს ევროპარლამენტში ასოცირების ხელშეკრულებით გათვალისწინებული ერთობლივი რეზოლუცია ჩავარდა. საბოლოო ვერსიის მხარდასაჭერად ევროპარლამენტისა და საქართველოს პარლამენტის დეპუტატების უმრავლესობის მხარდაჭერა იყო საჭირო.

რეზოლუციის შესწორებები მოამზადეს მმართველი გუნდის წარმომადგენლებმა, ოპოზიციამ და, ასევე, ევროპარლამენტარების ნაწილმა. ქართულმა ოცნებამ სწორედ ოპოზიციის შესწორებებს არ დაუჭირა მხარი. ამავე დროს, მმართველ გუნდში ამბობენ, რომ რეზოლუცია ოპოზიციისა და მათი მხარდამჭერი ევროპარლამენტარების გამო ვერ მიიღეს.

ევროპარლამენტში სახალხო პარტიის წევრმა, რასა იუკნევიჩიანე ევროკავშირი-საქართველოს ასოცირების კომიტეტის რეზოლუციის პროექტზე ვერშეთანხმების გამო განაცხადა, რომ "ძალიან გაბრაზებულია". მისი თქმით, რეზოლუციის პროექტი ძალიან სუსტი იყო და არ ასახავდა არსებულ ვითარებას.

როგორც იუკნევიჩიანე აცხადებდა, ამ სიტუაციაზე პასუხისმგებლობა ბიძინა ივანიშვილს ეკისრება.

"ჩვენ წარმოვადგინეთ ცვლილებები და გვსურდა დაბალანსებული ტექსტი. უმრავლესობის წევრებმა თითქმის ყველა ცვლილება ჩააგდეს. ძალიან გაბრაზებული ვარ. ამდენი შეხვედრა და კონსულტაცია გავმართეთ და მგონი, ვერაფერი გაიგეს. ახლა ქართულმა ოცნებამ კარგად უნდა გააანალიზოს არსებული სიტუაცია და შეცვალოს გარკვეული პოზიციები. ჩემი გზავნილია ბიძინა ივანიშვილის მიმართ, რომ ის არის სიტუაციაზე პასუხისმგებელი და სამწუხაროდ, ის აზიანებს საქართველოს ევროპულ კურსს", — განაცხადა რასა იუკნევიჩიანემ.

გარდა ამისა, ევროპარლამენტარებს არაერთი კრიტიკული განცხადება ჰქონდათ ევროპული საქართველოს ლიდერის, გიგი უგულავას დაკავებასთან დაკავშირებით. მათი თქმით, პოლიტიკური ზეწოლისთვის სასამართლოს გამოყენება დაუშვებელია.