ბრიტანელ ქალს, რომელიც სამგზავრო თვითმფრინავის კარის გაღებას ცდილობდა და ორი წლით თავისუფლების აღკვეთა მიუსაჯეს. თვითმფრინავი დიდი ბრიტანეთიდან თურქეთში მიფრინავდა.

The Guardian-ის ინფორმაციით, ქალს თვითმფრინავის პერსონალი და მგზავრები აკავებდნენ. ის ყვიროდა "სიკვდილი მინდა" და "მე თქვენ მოგკლავთ". ფრენის დამთავრებამდე კი მათ სამეფო სამხედრო-საჰაერო ძალების ორი გამანადგურებელი მიჰყვებოდა, თუმცა როგორც აღმოჩნდა მათი გაშვება შეცდომით მოხდა.

ავიაკომპანია Jet2-მა დათვალა, რომ აღნიშნულმა ინციდენტმა ისინი 86 ათასი ფუნტი სტერლინგით აზარალა.

სასამართლოზე 26 წლის ქლოე ჰეინსმა აღიარა, რომ თვითმფრინავში მყოფი 206 ადამიანის სიცოცხლე საფრთხის ქვეშ დააყენა და ეკიპაჟის წევრს, ჩარლი კუმბს თავს დაესხა. მისივე თქმით, მან ალკოჰოლი და მედიკამენტები ერთმანეთში აურია, რის შემდეგაც გონება დაკარგა და არაფერი ახსოვდა.

პროკურორის, მაიკლ კრიმპის თქმით, ქალი თვითმფრინავის კარის სახელურს მივარდა. მან აღნიშნა, რომ ფრენისას გასასვლელი კარის გაღება შეუძლებელი იქნებოდა, თუმცა მგზავრების დიდმა ნაწილმა ეს არ იცოდა. მისივე თქმით, რისკი იმან გააჩინა, რომ მთელი ეკიპაჟი ამ ინციდენტის მოგვარებით იყო დაკავებული და სხვა ნებისმიერი პრობლემასთან გამკლავებას ვერ შეძლებდა.