ქართულმა ოცნებამ ეუთოს დასკვნა საარჩევნო სისტემაზე განსხვავებულად წაიკითხა და დაასკვნა, რომ გერმანული მოდელის კონსტიტუციორობაზე დოკუმენტში საუბარი არ არის. ამის შესახებ ირაკლი კობახიძემ დღეს, 6 თებერვალს ქართული ოცნების ოფისში ბრიფინგი გამართა. კობახიძემ ოპოზიცია "ტყუილში" და "არაკომპეტენტურობაში" დაადანაშაულა და თქვა, რომ ეუთო ვერ დაასკვნიდა, ქვეყანამ რა სისტემა უნდა აარჩიოს:

"ეს არის დამახინჯებული გერმანული მოდელი, ავღანური ელემენტებით, რომელიც გაიგზავნა ოდირში. ოპოზიციამ მიიღო პასუხი იმაზე, რომ კანონპროექტის კონსტიტუციუროიბის დადგენა არაა ოდირის პრეროგატივა. ოდირი ვერ შეაფასებს კანონის კონსტიტუციურობას, ეს არის მთავარი დასკვნა. მათ [ოპოზიციამ] ისიც კი არ იციან, ვის უნდა გადაამოწმებინონ კანონპროექტის კონსტიტუციურობა, ანუ ორმაგი არაკომპეტენტურობა დადგინდა... ორი მესიჯი იკითხება ოდირის დასკვნიდან: ერთი, რომ საარჩევნო სისტემის შერჩევა სახელმიწფოს სუვერენული უფლებაა, ასევე, არის კიდევ ერთი, რომ საარჩევნო წელს სისტემა არ უნდა იცვლებოდეს".

კობახიძე ოპოზიციას ურჩევს, დათანხმდეს მათ შეთავაზებას 100/50-ზე, წინააღმდეგ შემთხვევაში, მისი თქმით, არსებული სისტემით ჩატარდება არჩევნები 2020 წელს.

ეუთო/ოდირის დასკვნა საარჩევნო სისტემის ცვლილებაზე გუშინ, 5 თებერვალს გამოქვეყნდა. ევროპული საქართველოს ლიდერის, სერგი კაპანაძის თქმით, დასკვნით ე.წ. გერმანული მოდელი სრულად შეესაბამება საქართველოს კონსტიტუციას:

"როგორც მოსალოდნელი იყო, ეუთო ამ დასკვნაში საუბრობს იმაზე, რომ ეს მოდელი არის სრულ შესაბამისობაში საერთაშორისო სტანდარტებთან, მას არ აქვს არანაირი წინააღმდეგობა არც საუკეთესო პრაქტიკასთან, რომელიც ევროპაში თუ სადმე სხვაგან არსებობს. ეუთო ამბობს, რომ ნებისმიერი მოდელი, რომელიც იქნება შეთავაზებული მხარეებს შორის და მასზე უნდა არსებობდეს კონსენსუსი. ანუ ამბობს სწორედ იმას, რაზეც ამდენი ხანია, საუბრობს ოპოზიცია და რაზეც მოუწოდებს ხელისუფლებას, რომ წამოვიდეს დიალოგზე".

ეუთოს დოკუმენტში აღნიშნულია, რომ საარჩევნო მოდელთან დაკავშირებით გადაწყვეტილების მიღება ქვეყნის სუვერენული უფლებაა, თუმცა ასევე, წერია ისიც, რომ კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლობელმა უნდა მიიღონ.

დოკუმენტში აღნიშნულია ისიც, რომ შემოთავაზებული ე.წ. გერმანული მოდელი აკმაყოფილებს უნივერსალური, თავისუფალი, ფარული და პირდაპირი ხმის მიცემის, ასევე, პერიოდული არჩევნების პრინციპებს.

ეუთო აცხადებს, რომ ნებისმიერი საარჩევნო ცვლილება საგულდაგულოდ უნდა განიხილონ და პარტიებმა ფართო კონსესუსით მიიღონ.