პარლამენტის ყოფილი თავმჯდომარე და უმრავლესობის წევრი, ირაკლი კობახძე ევროპის საბჭოს საპარლამენტო ასამბლეის ვიცე-პრეზიდენტად აირჩიეს. კობახიძის ევროსაბჭოს საპარლამენტო ასამბლეის ვიცე-პრეზიდენტად არჩევის საკითხს ევროსაბჭოს ზამთრის სესიაზე კენჭი დღეს, 27 იანვარს, უყარეს.

ირაკლი კობახიძემ საპარლამენტო ასამბლეაში საპარლამენტო უმრავლესობის ყოფილი წევრი თამარ ჩუგოშვილი ჩაანაცვლა. ასევე, ევროპის საბჭოში საქართველოს დელეგაციის შემადგენლობაც განახლდა. ქართულ დელეგაციაში შედიან: ირაკლი კობახიძე, ირაკლი ბერაია, კახაბერ კუჭავა, ნინო წილოსანი და დავით ბაქრაძე.

საქართველო ევროპის საბჭოს მინისტრთა კომიტეტის თავმჯდომარე ქვეყანა 2019 წლის 27 ნოემბერს გახდა და 2020 წლის 15 მაისის ჩათვლით იქნება. საქართველომ თავმჯდომარეობა საფრანგეთისგან ლათინური ანბანის მიხედვით რიგითობით გადმოიბარა.

მინისტრთა კომიტეტი ევროპის საბჭოს აღმასრულებელი ორგანოა. ის აერთიანებს ორგანიზაციის ყველა წევრი სახელმწიფოს საგარეო საქმეთა მინისტრებს ან მათ მუდმივ დიპლომატიურ წარმომადგენლებს სტრასბურგში. მინისტრთა კომიტეტი ერთდროულად სამთავრობო ორგანოც არის, სადაც, თანასწორობის პრინციპზე დაყრდნობით, განიხილება წევრ სახელმწიფოთა ინდივიდუალური დამოკიდებულება ევროპული საზოგადოების წინაშე მდგომი პრობლემებისადმი და ფორუმიც, სადაც ხდება საერთოევროპული მიდგომების ჩამოყალიბება მათთან მიმართებაში.