უმრავლესობის წევრი რომან კაკულიას მიაჩნია, რომ Human Right Watch-ს ანგარიშის ფორმირებაში მონაწილეობა ოპოზიციონერმა პოლიტიკოსებმა მიიღეს. მისივე თქმით, ამას საზოგადოებაც უნდა მიხვდეს.

"არიან ისეთი ტიპის პოლიტიკოსები, რომლებიც საკუთარ თავს პოლიტიკოსებს უწოდებენ. საზოგადოებაში ავტორიტეტის დაბრუნებით კი არ ცდილობენ ხელისუფლებაში დაბრუნებას, არამედ ყველაფერს აკეთებენ იმისთვის, რომ ქვეყნის ხელისუფლების იმიჯი გაანულონ ნებისმიერი მეთოდებით. მე, სამწუხაროდ, ამ პრინციპს ვიცნობ", — განუცხადა რომან კაკულიამ რუთავი 2-ს.

საერთაშორისო უფლებადამცველმა ორგანიზაციამ, The Human Right Watch-მა, რომელიც მსოფლიოს ასამდე ქვეყნებში არსებულ ვითარებას აანალიზებს, ყოველწლიური ანგარიში გამოაქვეყნა. 2019 წელს საქართველოს შესახებ ანგარიშში ყურადღება გამახვილდა სამართალდამცავთა დაუსჯელობაზე, პოლიტიკური დაძაბულობაზე, შრომის კანონმდებლობის არასაკმარის რეგულაციებსა და მკაცრ ნარკოპოლიტიკაზე.

Human Right Watch წერს, რომ უფლებამოსილების ბოროტად გამოყენების შემთხვევებზე სამართალდამცავთა დაუსჯელობა ქვეყნისთვის ისევ გადაუჭრელი პრობლემაა. მათი თქმით, დაფინანსების არქონის მიზეზით ხელისუფლებამ ორჯერ გადადო სახელმწიფო ინსპექტორის სამსახურის ამოქმედება, რომელიც 2018 წელს შეიქმნა და მუშაობა 2019 წლის პირველ ნოემბერს დაიწყო.