რუსეთში, ხაბაროვსკის ოლქში შვიდი თვის ბავშვი აივანზე რამდენიმე საათით დატოვეს, რის შედეგადაც ბავშვი გაიყინა და გარდაიცვალა. შემთხვევა 5 იანვარს მოხდა. სისხლის სამართლის საქმე უკვე აღძრულია.

როგორც BBC რუსულ მედიაზე დაყრდნობით წერს, გამოძიების ინფორმაციით, აივანზე შვიდი თვის ბავშვი ეტლში დატოვეს, რათა მას სუფთა ჰაერზე დაეძინა. ხუთი საათის შემდეგ კი მშობლებმა აღმოაჩინეს, რომ ჩვილი დაბალი ტემპერატურის გამო გაიყინა.

ხაბაროვსკის მხარის ჯანდაცვის სამინისტრო მოუწოდებს მშობლებს, რომ ბავშვების მიმართ უფრო მეტი ყურადღება გამოიჩინონ, განსაკუთრებით კი დღესასწაულების პერიოდში:

"ყოველთვის იცოდეთ სად და ვისთან ერთად არის თქვენი შვილი. გვერდით არ ჩაიაროთ თუ ბავშვი საფრთხეშია — ზამთარში დაკარგული ან დაშავებული ბავშვი შეიძლება მალევე გახდეს დაბალი ტემპერატურის მსხვერპლი".

რუსეთში სუსხიანი ზამთრისა და დაბალი ტემპერატურის პირობებში მოქალაქეები ხშირად იყინებიან. 2 იანვარს ომსკის ოლქში 17 წლის მოზარდი გაიყინა. 28 დეკემბერს კი ვორკუტის ნასვამმა მაცხოვრებელმა სცადა, რომ ფანჯრიდან ქუჩაში გადასულიყო, თუმცა გაიჭედა და გაიყინა.