9 სამოქალაქო აქტივისტის დაკავების შემდეგ მერიის შესაბამისმა სამსახურებმა, პოლიციის კორდონის დახმარებით, ზვიგენის ბატუტი გაშალეს. გარდა ამისა, პარლამენტის წინ კარვების აშლისა და ჩარეცხვის შემდეგ საბავშვო ატრაქციონები დაამონტაჟეს.

შინაგან საქმეთა სამინისტროს განცხადებით, დაკავებულებს წვრილმან ხულიგნობასა და პოლიციისადმი დაუმორჩილებლობას ედავებიან. პოლიციასა და აქტივისტებს შორის დაპირისპირება სწორედ საპროტესტო ატრიბუტიკის აღებას მოყვა. კარვების გარდა, რუსთაველის გამზირზე იყო აქციებისთვის საჭირო ატრიბუტიკა — დროშები, "გახარიას ბიუსტი" და ბანერები.

მოძრაობა #სირცხვილიას ინფორმაციით, დაკავებულებს შორის არიან აქტივისტები: ზუკა ბერძენიშვილი ბექა კოკაია, ნოდარ რუხაძე, ბექა ბასილია, ზურა მჟავანაძე და გიორგი მუმლაძე. ნახეთ, ნოდარ რუხაძის დაკავების კადრები, რა დროსაც ის შეუძლოდ გახდა.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.

გაიგეთ მეტი პარლამენტთან მიმდინარე დაპირისპირებაზე: