ქართული ოცნების თავმჯდომარეზე, ბიძინა ივანიშვილზე კლიპის გამო კომუნიკაციების კომისიამ მთავარი არხი დაასანქცირა და პოლიტიკური რეკლამის ეთერიდან დაუყოვნებლივ ამოღება დაავალა. საკითხთან დაკავშირებით კომუნიკაციების კომისიამ დღეს, 30 დეკემბერს, გამართულ საჯარო სხდომაზე იმსჯელა.

"საქმე ეხება მთავარი არხის ეთერში 2019 წლის 19 დეკემბრიდან ეთერში გასულ პოლიტიკურ რეკლამებს, რომლის განთავსებაც მაუწყებლებს საქართველოს კანონმდებლობის შესაბამისად, მხოლოდ წინასაარჩევნო პერიოდში შეუძლიათ. მაუწყებელი ვალდებულია უზრუნველყოს მის მიერ გადაცემული რეკლამის საქართველოს კანონმდებლობასთან შესაბამისობა, რაც მთავარი არხის მხრიდან დარღვეულია", — ნათქვამია კომუნიკაციების ეროვნული კომისიის განცხადებაში.

მთავარი არხის იურისტი, თამთა მურადაშვილი On.ge-სთან საუბრისას აცხადებდა, რომ კომისიას არხისთვის სანქციის დაკისრების სამართლებრივი საფუძველი არ აქვს. მისი აზრით, მხოლოდ იმ ვიდეორგოლის შინაარსის სადავოდ მიჩნევა, რომელიც ბიძინა ივანიშვილს ეხება, იმაზე მიუთითებს, რომ მის "დაცვას" ცდილობენ.