გაუპატიურებისა და მსხვერპლის შერცხვენის შესახებ ჩილეში შექმნილ სიმღერას უკვე ქალები მთელ მსოფლიოში მღერიან.

Un Violador en Tu Camino — მოძალადე შენს გზაზე — სიმღერის პირველი პერფორმანსი ჩილეში ნოემბრის ბოლოს გაიმართა, როდესაც თვალახვეული ქალები სოციალური უთანასწორობი გამო ქუჩაში გავიდნენ. სიმღერა და მასთან თანხმლები ცეკვა ლათინური ამერიკის ქვეყნებში მალევე გავრცელდა, შემდეგ კი მთელ მსოფლიოს მოედო. ძალადობის წინააღმდეგ ქალებმა იმღერეს მექსიკაში, საფრანგეთში, ესპანეთში, კოლუმბიაში, დიდ ბრიტანეთსა და სხვა ქვეყნებში.

ტექსტი ჩილეს ერთ-ერთ ქალაქ ვალპარაისოში ფემინისტურმა თეატრალურმა ჯგუფმა Lastesis-მა დაწერა.

"არ იყო ჩაფიქრებული, რომ სიმღერა საპროტესტო უნდა ყოფილიყო, ქალებმა ის უფრო დიდ რამედ გადააქციეს", — განაცხადა პაულა კომეტამ, რომელიც ჯგუფის ერთ-ერთი წევრია.

ფოტო: AP

ფოტო: AP

მოძალადე შენს გზაზე დაფუძნებულია არგენტინელი თეორეტიკოსის, რიტა სეგატოს ნამუშევრებზე, რომელიც ამბობს, სექსუალური ძალადობა პოლიტიკური პრობლემაა და არა მორალური.

სიმღერაში საუბარია, რომ პოლიცია, სასამართლო და პოლიტიკური სტრუქტურები მხარს უჭერენ ქალებზე სისტემატიურ ძალადობას.

"მოძალადე შენ ხარ / პოლიციაა / სასამართლოა / სახელმწიფოა / პრეზიდენტია", — ნათქვამია ტექსტში.

გარდა ამისა, სიმღერაში საუბარია იმაზეც, რომ გაუპატიურების მსხვერპლ ქალებს ხშირად ადანაშაულებენ მათზე განხორციელებული ძალადობის გამო:

"ჩემი ბრალი არაა სად ვიყავი და არც ის, რა მეცვა".

The Guardian-ის მიხედვით, სექსუალური ძალადობის გამო ჩილეს პოლიციაში ყოველდღიურად 42 შეტყობინება შედის. 2018 წელს ძალადობის საქმეებიდან მხოლოდ 25,7 პროცენტს მოჰყვა სასამართლო გადაწყვეტილება.