ევროპული საქართველოს ლიდერმა, გიგი უგულავამ ჟურნალისტებთან საუბარში თქვა, რომ დღეისათვის პარლამენტის პიკეტირება დასრულებულია, თუმცა მომდევნო სხდომებზე განახლდება. უგულავას თქმით, მასშტაბური აქცია იგეგმება სესიის იმ დღეს, როდესაც მოსამართლეების დანიშვნაზე უნდა იმსჯელოს პარლამენტმა:

"მურუსიძეების დანიშვნას რომ დაიწყებთ აქ, შემდეგის შემდეგ კვირას, მერე ნახეთ არმაგედონი, ეს ჯებირები არ გეყოფათ. იმ მზაკვრობისა და იმ ტყუილის პირდაპირ შედეგს ვიმკით, რომ სასამართლოს მიტაცება ხდება. აი, ასე, ნაბიჯ-ნაბიჯ მიიტაცა ყველაფერი ამ კაცმა [ბიძინა ივანიშვილმა]".

ოპოზიციონერებმა და აქტივისტებმა დღეს, 28 ნოემბრის სესიის დაწყებამდე პარლამენტის პიკეტირება დაიწყეს. ადგილზე მისულებს პოლიციის კორდონი და მათ მიმა რკინის ჯებირები დახვდათ. პარლამენტთან მისასვლელი ყველა ქუჩა ჩაკეტილია. აქტივისტებმა სხვადასხვა სახის აქცია-პერფორმანსით სცადეს მესიჯის გავრცელება, ოპოზიციონერი დეპუტატები კი პარლამენტის ეზოში შევიდნენ და ქართული ოცნების დეპუტატებს დახვდნენ.

მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.