თბილისში დაწყებული საპროტესტო აქციების ფონზე, ქართული ოცნების გენერალურმა მდივანმა, კახა კალაძემ ბრიფინგზე განაცხადა, რომ ოპოზიციის მხრიდან "დესტრუქციის" გაგრძელების შემთხვევაში ხელისუფლებას ექნება შესაბამისი რეაგირება.

მან გაერთიანებული ოპოზიციის აქციის ორგანიზება ნაციონალურ მოძრაობას დააბრალა და პარლამენტის შენობის შესასვლელების პიკეტირება შეაფასა, როგორც "იაფფასიანი პერფორმანსებით დესტრუქციის მცდელობა".

კახა კალაძემ თქვა, რომ 2020 წელს არჩევნები მაინც პროპორციულ-მაჟორიტარული, შერეული სისტემით ჩატარდება:

"არჩევნებს იგებს საზოგადოების ნდობა და არა საარჩევნო სისტემა".

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.