"მეტ-ნაკლებად, ზოგიერთ საკითხებში", — ასე პასუხობს ანდრია ჯაღმაიძე კითხვას, აღიქმება თუ არა საპატრიარქო კონკურენტად ხელისუფლებისთვის და ცდილობს თუ არა ის თავისი ინტერესების გატარებას. ამის შესახებ მან ტელეკომპანია პირველის ეთერში ისაუბრა.

ჯაღმაიძე მარიხუანის კულტივაციის კანონპროექტის შესახებ საპატრიარქოს პრინციპულ პოზიციასა და მთავრობის მიერ მის გაწვევაზე საუბრობდა, როდესაც წამყვანმა ვახო სანაიამ მას ჰკითხა, არის თუ არა იმის ნიშნები, რომ ხელისუფლება დგამს კონკრეტულ ნაბიჯებს საპატრიარქოში სასურველი კონფიგურაციის მისაღებად და აღიქვამს მას კონკურენტად. ჯაღმაიძემ აღნიშნა, რომ ეს "მეტ-ნაკლებად" იგრძნობა და დაამატა, რომ კონკურენცია იგრნობოდა მარიხუანის კანონპროექტრისა და თბილისი პრაიდის ჩატარების საკითხის განხილვისას.

შეგახსენებთ, რომ მარიხუანის კანონპროექტი მთავრობამ სწორედ პატრიარქთან შეხვედრის შემდეგ გაიწვია. მანამდე საპატრიარქო და სასულიერო პირები ღიად უპირისპირდებოდნენ ამ კანონპროექტს და ძალის დემონსტრირებით იმუქრებოდნენ.

ასევე, ეწინააღმდეგებოდა საპატრიარქო თბილისი პრაიდის ჩატარებასაც. რამდენიმე თვიანი განხილვების შემდეგ შინაგან საქმეთა სამინისტრომ ღირსების მარშის ჩატარებაზე პრაიდის ორგანიზატორებს უსაფრთხოების გარანტიები არ მისცა.