თბილისის სააპელაციო სასამართლოს გადაწყვეტილებით, დემოკრატიული მოძრაობის წევრს, ბესიკ დანელიას ლგბტ აქტივისტის, ლევან ბერიანიძის სიტყვიერი შეურაცხყოფისთვის 500 ლარის ოდენობის ჯარიმის გადახდა დაეკისრა. ინფორმაციას ამის შესახებ თანასწორობის მოძრაობა ავრცელებს.

ორგანიზაციის ინფორმაციით, სააპელაციო სასამრთლომ მიიჩნია, რომ თბილისის საქალაქო სასამართლოს მიერ მიღებულ გადაწყვეტილებას ვერ იქნებოდა შემაკავებელი და შესაძლოა წამახალისებელიც გამხდარიყო:

"რადგანაც 1 ლარის დაკისრებით მოპასუხე ფაქტობრივად გათავისუფლდა ყოველგვარი პასუხისმგებლობისაგან".

თანასწორობის მოძრაობაში აცხადებენ, რომ ეს დაადასტურა იმანაც, რომ ბესიკ დანელიამ პირველი ინსტანციის სასამართლოს გადაწყვეტილების გამოცხადების შემდეგ კვლავ გააგრძელა შეურაცხმყოფელი განცხადებების გავრცელება.

"სასამართლომ მიიღო სწორი გადაწყვეტილება, პიდარასტების მორალი შეფასდა ერთ ლარად... მან ამ გადაწყვეტილებით ყველაფერი ნათლად უთხრა ლევან ბერიანიძესაც და ამ იდენტობასაც და ყველა იმ ადამიანს, რომელიც ცდილობს, რომ თითიდან გამოწოვილი ბრალდებებით ცდილობენ შექმნან პრეცენდენტები ვითომ ისინი იჩაგრებიან", — ასე შეაფასა საქალაქო სასამართლოს გადაწყვეტილება On.ge-სთან საუბრისას დანელიამ 2018 წლის დეკემბერში.

სწორედ ამ გარემოების გათვალისწინებით, სააპელაციო სასამართლოს გადაწყვეტილებას პრეცენდენტულს უწოდებენ თანასწორობის მოძრაობაში:

"შეიქმნა პრეცედენტი, რომლითაც ლგბტ ადამიანებს შეეძლებათ კანონით დადგენილი წესით ეფექტიანად დაიცვან საკუთარი პატივი და ღირსება შელახვისგან. ამასთან, მიგვაჩნია, რომ სააპელაციო სასამართლოს გადაწყვეტილებას ექნება ერთგვარი შემაკავებელი ხასიათი ჰომო- და ტრანსფობიურად განწყობილი ადამიანებისთვის".