საქართველოს პარლამენტის წევრი ევროპული საქართველოდან, აკაკი ბობოხიძე ამბობს, რომ 2012 წლიდან მართლმადიდებელმა ეკლესიამ ხელისუფლებისგან იმაზე მეტი სარგებლის მიღება მოითხოვა, ვიდრე მას ჰქონდა. ამ საკითხზე ბობოხიძემ ღამის მთავარის ეთერში ისაუბრა.

"2012 წლიდან ეკლესიამ იმაზე მეტი მოინდომა, ვიდრე მას ჰქონდა. ხელისუფლებისგან მარტო ხარკის გადახდა კი არ მოითხოვა, პირდაპირ პოლიტიკური ხელისუფლების განაწილებაც მოითხოვა, რაც უკვე გადამეტება იყო", — თქვა ბობოხიძემ.

მისივე განმარტებით, ყველა ხელისუფლებას უწევდა და მოუწევს ეკლესიისთვის "ხარკის" გადახდა, რადგან ის ანგარიშგასაწევი ძალაა.

"ეკლესია არა მხოლოდ შენს ხელშია კარგი პარტნიორი, არამედ მოწინააღმდეგის. ყველაზე დიდი პრობლემა არის ის, რომ ქართულ ეკლესიაში არის რუსული გავლენა ძალიან დიდი, ხოლო ქართულ ეკლესიას აქვს ხალხში დიდი გავლენა", — განმარტა ბობოხიძემ.