ინფრასტრუქტუტის მინისტრის, მაია ცქიტიშვილის თქმით, საქართველოს ენერგეტიკის სფეროში ინვესტიციები მოსახლეობის პროტესტის გამო დააკლდა. ამის შესახებ მინისტრმა დღეს, 22 ოქტომბერს აბრეშუმის გზის ფორუმზე ისაუბრა. მანვე აღნიშნა, რომ ფორუმზე განსაკუთრებული აქცენტი ენერგეტიკის სფეროს განვითარებას დაეთმო:

"ენერგეტიკის სექტორი არის ის სექტორი, სადაც ჩვენ გვჭირდება განვითარება. ჩვენ გვჭირდება მეტი ჰიდროელექტროსადგური, მეტი ენერგიის გამომუშავება. დღეს ბევრი დიდი აქცენტი გაკეთებული იყო ენერგოსექტორში თანამშრომლობაზე. ენერგოსექტორი არის ის სექტორი სადაც ჩვენ დაგვაკლდა ინვესტიციები მოსახლეობის პროტესტის გამო. ეს არის ის სექტორი სადაც ჩვენ გვაქვს ძალიან დიდი პოტენციალი", — განაცხადა მან.

სემეკის ახლადარჩეულმა თავმჯდომარემ, დავით ნარმანიამ განაცხადა, რომ თუ მოსახლეობას არ სურს გაუძვირდეს ტარიფები, მაშინ ჰესები უნდა ავაშენოთ. მისი თქმით, წინააღმდეგ შემთხვევაში ელექტროენერგია საკმარისი არ არის და იმპორტირებულის ყიდვა უწევთ, რაც უფრო ძვირი ჯდება. ამის შესახებ მან ინტერპტრესნიუსთან ისაუბრა.

ეს პირველი შემთხვევა არ არის, როდესაც სამთავრობო გუნდის წევრები ეკონომიკურ პრობლემებს სამოქალაქო პროტესტს აბრალებენ. მაგალითად, იგივენაირად შეფასდა 20 ივნისის შემდგომ განვითარებული საპროტესტო აქციები. რაც შეეხება ენერგეტიკის სფეროში ინვესტიციებს, მინისტრი ჰესების წინააღმდეგ საპროტესტო გამოსვლებს გულისხმობდა, რომელიც სხვადასხვა რეგიონებში იმართება.