ძალადობაში ბრალდებული ილია ჯიშკარიანი ამბობს, რომ ის სავარაუდო მსხვერპლისგან თამთა თოდაძისგან ბოდიშის მოხდას ელოდა. ამის შესახებ მან TV პირველის ეთერში ისაუბრა.

ქართული ოცნების დეპუტატი თბილისის საკრებულოში ამბობს, რომ თავის თანამშრომელზე არ უძალადია და კონფლიქტის ინცენირება მოხდა.

"ყველაფერი დალეწა მან და თავის დალეწილში აიხლართა... საიდან მიიღო დაზიანება, იქნება, ისეთი ნასვამი იყო, ქუჩაში წაიქცა?.. მე რა ვიცი, გაეხახუნა იქნებ კედელს", — ამბობს ბრალდებული.

ჟურნალისტის კითხვაზე, რატომ არ გამოიძახა პოლიცია, თუ თოდაძემ ტექნიკა დალეწა, ჯიშიკარიანი ასე პასუხობს:

"მე რომ პატრული გამომეძახებინა, მე რა დეპუტატი ვიქნები? კარგი, ერთი პრინტერი გადმოაგდო და მე შეურაცხყოფა მომაყენა. მე ხო არ ვიცოდი, აქეთ მიჩივლებდა და ძალადობას დამაბრალებდა. მე ველოდებოდი მეორე დღეს ბოდიშით მოვიდოდა მაგი და გადავწყვიტავდით პრინტერის და მონიტორის ამბავს იმიტომ, რომ საკრებულოს ქონებაა".

დეპუტატმა TV პირველის ეთერში თოდაძის ოჯახზე ისაუბრა და სცადა იმის ახსნა რამდენად ღირსეული ოჯახი აქვს მას, ვიდრე სექსუალური ძალადობის სავარაუდო მსხვერპლს.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძის თქმთ, ჯიშკარიანმა მასზე 30 სექტემბერს იძალადა, თუმცა ამ დრომდე მას დაზარალებული სტატუსი არ ჰქონდა მინიჭებული. ამის მიზეზად პროკურატურა ექსპერტიზის დასკვნის არარსებობას ასახელებდა.

6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიამართა. 8 ოქტომბერს მისმა უფლებადამცველმა პროკურატურას დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.

11 სექტემბერს სექსუალურ ძალადობაში დადანაშაულებულ ილია ჯიშკარიანს სასამართლომ 10 ათასი ლარის ოდენობის გირაო შეუფარდა. მასვე საქმეზე დაკითხულ მოწმეებთან ნებართვის გარეშე კომუნიკაცია და დაზარალებულ თამთა თოდაძესთან მიახლოება აეკრძალა.