ინფრასტრუქტურის მინისტრი მაია ცქიტიშვილი მოძრაობა ლელოს დამფუძნებელს, მამუკა ხაზარაძეს, რომელმაც დღეს სექსისტურად მოიხსენია, დებატებში იწვევს. ხაზარაძე უარზეა და ქართული ოცნების დამფუძნებელთან, ბიძინა ივანიშვილთან ითხოვს დებატებს.

"თუ მას არ შერცხვება იმის შემდეგ, რაც დღეს იკადრა, თვალებში ჩამხედოს და დაჯდეს დებატებში, მე, რა თქმა უნდა, თანახმა ვარ ვისაუბრო როგორც რიცხვებზე, ასევე, ქვეყნის განვითარებაზე", — ამბობს ცქიტიშვილი.

თუმცა, ხაზარაძე ფიქრობს, რომ ცქიტიშვილს ხმა მაშინ უნდა ამოეღო, როცა ყოფილი შინაგან საქმეთა და მოქმედი პრემიერ-მინისტრი გიორგი გახარია ბიზნესმენს ემუქრებოდა.

"ცქიტიშვილთან სადებატო არაფერი არა მაქვს, თუ ბიძინა ივანიშვილი გამოვა დებატებზე, სიამოვნებით დავუჯდები და როგორც დღეს ვთქვი, თუ შვიდი წლის განმავლობაში სად მიიყვანა მისმა ხელისუფლებამ ჩვენი ქვეყანა", — განაცხადა ხაზარაძემ პალიტრანიუსის ეთერში.

დღეს, 3 ოქტომბერს თიბისი ჯგუფისა და მოძრაობა ლელოს დამფუძნებელმა, მამუკა ხაზარაძემ განაცხადა, რომ ცქიტიშვილს წარმოდგენა არ აქვს ინფრასტრუქტურაზე და შესაძლოა, კარგად აცხობდეს ხაჭაპურს. მოგვიანებით მან განმარტა, რომ თანასწორობა მისთვის მნიშვნელოვანი პრინციპია და დროა ხაჭაპურზე საუბარი დასრულდეს.

პასუხად ცქიტიშვილმა თქვა, რომ ხაზარაძისგან განსხვავებით, კარგად აცხობს ხაჭაპურს და კარგად აკეთებს მის საქმეს. მან ახალგაზრდა გოგოებს მოუწოდა, არ შეუშინდნენ ასეთი ტიპის განცხადებებსა და დამოკიდებულებას, ისწავლონ, გააკეთონ ის საქმე, რაც უყვართ და მიხედონ თავის ოჯახსა და ქვეყანას.

ამავე თემაზე: