საქართველოს პრემიერ-მინისტრმა, გიორგი გახარიამ 2020 წელს ბიუჯეტში შესატან იმ საკითხებზე ისაუბრა, რომლითაც დაგეგმილია სხვადასხვა ჯგუფებისთვის პენსიის გაზრდა. ცვლილებებით გათვალისწინებულია მასწავლებლების, ექიმების სამართალდამცავებისა და ჯარისკაცებისთვის ანაზღაურების გაზრდაც.

მისი თქმით, ამ პროექტზე პოლიტიკური გუნდი და მთავრობა მუშაობდა. ხელფასებისა და პენსიის ზრდა დროში ემთხვევა საქართველოში დაგეგმილ საპარლამენტო არჩევნებს.

"გვესმის, რომ ეს არის აუცილებელი ის მინიმუმი, რისთვისაც ჩვენ უნდა დავეხმაროთ ჩვენს მოქალაქეებს. ხაზგასმით აღვნიშნავ, იმ ჯგუფს, რომელზეც დგას ჩვენი ქვეყნის განვითარება და მომავალი: ბავშვები, პენსიონერები, მასწავლებლები, სამართალდამცველები და ჯარისკაცები და რა თქმა უნდა, ექიმები", — თქვა პრემიერმა.

დაგეგმილი ცვლილებები:

  • ყველა პენსიონერის, 18 წლამდე ასაკის პირებისა და პირველი და მეორე ჯგუფის შშმ პირების პენსიის 20 ლარით გაზრდა;
  • პირველი ივლისიდან 70 წელს გადაცილებული პენსიონერების პენსიის დამატებით 30 ლარით გაზრდა (ანუ ჯამში 50 ლარი);
  • სრულ განაკვეთზე მყოფი მასწავლებლების ანაზღაურება 2020 წლის სასწავლო წლისთვის გაიზრდება 300 ლარით;
  • 2020 წლის სასწავლო წლისთვის გაიზრდება საბავშვო ბაღების მასწავლებელთა ხელფასებიც, საშუალოდ, 100 ლარით;
  • ხელფასი გაეზრდებათ სამართალდამცავებს, ჯარისკაცებსა და მათთან გათანაბრებულ პირებს. მათი ხელფასი გაიზრდება მინიმუმ 125 ლარით.
  • 2020 წლის პირველი ივლისისთვის გაიზრდება სოფლის ექიმების ხელფასებიც 100 ლარით.