"კოლაბორაციონიზმი სირცხვილია" — ამ შინაარსის აქციას საქართველოს საგარეო საქმეთა სამინისტროსთან #სირცხვილია მართავს. მოქალაქეები საქართველოსა და რუსეთის საგერო საქმეთა მინისტრების შეხვედრას აპროტესტებენ.

"ჩვენ მივალთ ყველგან, სადაც ქართული ოცნებაა და ვეტყვით, რომ მსგავსი შეხვედრები სირცხვილია", — ამბობს სამოქალაქო აქტივისტი, ნოდარ რუხაძე On.ge-სთან საუბრისას.

ნიუ იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.

25 სექტემბერს ლავროვმა საქართველოსთან ავიამიმოსვლის აღდგენის სურვილი გამოთქვა. მისი თქმით, ამის მიზეზი ისაა, რომ "საქართველოში უმრავლესობამ მართლმადიდებლობის საპარლამენტო ასამბლეაზე რუსეთის წინააღმდეგ პროვოკაციის კონტრპროდუქტიულობა გააცნობიერა".

რუსეთის საგარეო საქმეთა მინისტრი, სერგეი ლავროვი ამბობს, რომ გაეროში საქართველოს საგარეო საქმეთა მინისტრთან შეხვედრა თავად მინისტრმა ითხოვა.

ლავროვი აცხადებს, რომ შეხვედრაზე დავით ზალკალიანი დაინტერესდა, როდის აღდგებოდა რუსეთ-საქართველოს შორის ავიამიმოსვლა, რაზეც ლავროვის თქმით, მან უპასუხა, რომ ეს დროებითი ღონისძიებაა და სიტუაციის ნორმალიზების შემთხვევაში ფრენები აღდგება.