საქართველოს პარლამენტის წევრის, სალომე სამადაშვილის თქმით, ბიძინა ივანიშვილთან ბრძოლა გაგრძელდება. მან ყოველ 20 რიცხვში პარლამენტის შენობასთან აქცია დააანონსა.

"როგორც ჩანს, ბიძინა ივანიშვილმა არ იცის, რა არის რევოლუცია. რევოლუცია არის, როდესაც ხალხი აცხადებს, რომ ის თავად განსაზღვრავს, ვინ არის მტერი და ომი არის, როდესაც ხელისუფლება გეუბნება, ვინ არის მტერი. ჩვენ ქართველმა ხალხმა ერთად გადავწყვიტეთ, მტერი არის პუტინი, მტერი არის გავრილოვი, მტერი არის რუსეთის რეჟიმი და მტერი არის რუსეთიდან მართული ოლიგარქიული რეჟიმი საქართველოში", — განმარტა სამადაშვილმა.

მისი თქმით, ივანიშვილმა საქართველოს მტრებად გამოაცხადა თავისი ოპოზიცია და ყველა ის, ვისაც სურს თავისუფალ ქვეყანაში ცხოვრება.

"ივანიშვილი მაშინ მიიღებს ამ ომში პასუხს. არც ერთ ომში, რომელიც ხელისუფლებამ გამოუცხადა საკუთარ ხალხს, არ გაუმარჯვია ხელისუფლებას. ვერ გაიმარჯვებს ვერც ივანიშვილი", — აღნიშნა სამადაშვილმა.

მისი თქმით, მათი სურვილია ხელისუფლების არჩევნების გზით შეცვლა, მაგრამ თუ ეს არ იქნება შესაძლებელი, "არ იქნება სიმშვიდე" და "ივანიშვილი მიიღებს იმას, რისიც ეშინია — ქართველი ერი თავად განსაზღვრავს, ვინ არის მტერი".

დღეს 3 თვე გავიდა, რაც მოქალაქეები რუსთაველის გამზირზე გიორგი გახარიას გადადგომას ითხოვენ. აქციები თბილისში მას შემდეგ დაიგეგმა, რაც 20 ივნისს თბილისის პარლამენტის შენობაში პარლამენტის თავმჯდომარის სავარძელში რუსი დეპუტატი სერგეი გავრილოვი ჩაჯდა.

რუსი დეპუტატის ეს ქმედება იმავე საღამოს რამდენიმე ათასმა ადამიანმა გააპროტესტა. აქცია გვიან ღამით პოლიციამ ძალის გადამეტებით დაშალა. სპეცრაზმელების ტყვიამ ორ მოქალაქეს თვალი დააკარგვინა, რამდენიმე ათეული ადამიანი კი საავადმყოფოში მოხვდა. სწორედ ამ დროიდან დაიწყო შინაგან საქმეთა მაშინდელი მინისტრის, გიორგი გახარიას გადადგომის მოთხოვნა. საპარლამენტო უმრავლესობამ კი ის დააწინაურა და პრემიერად დანიშნა.