ახალგაზრდა იურისტთა ასოციაციამ ბრიფინგი გამართა და განაცხადა, რომ არჩევნების ჩატარების ხარისხი წინა წლებთან შედარებით გაუარესებულია. ანა ნაცვლიშვილის თქმით, მიუხედავად იმისა, რომ ხმის მიცემის პროცესი, ძირითადად, მშვიდად მიმდინარეობდა, ყურადსაღები დარღვევები დაფიქსირდა:

"ხმების დათვლის და კენჭისყრის შედეგების შეჯამების დროს არაერთ შემთხვევაში უხეში დარღვევების ფონზე წარიმართა რაც ძალადობრივ მოვლენებში გამოიხატებოდა. დაფიქსირდა უბნებში შეჭრის შემთხვევები, რამაც კონკრეტულ უბნებზე გავლენა მოახდინა არჩევნების შედეგებზე და მნიშვნელოვანი ზიანი მიაყენა კენჭისყრის დღის საერთო სურათს".

ნაცვლიშვილმა რამდენიმე საკითხზე გაამახვილა ყურადღება:

"ამომრჩეველს ძირითადად ნების თავისუფალი გამოვლენის შესაძლებლობა ჰქონდა. თუმცა, კვლავ გაგრძელდა ამომრჩევლის ნებაზე არაპირდაპირი კონტროლის მცდელობები, რაც გამოიხატებოდა უბნების ტერიტორიაზე საარჩევნო სუბიექტების აქტივისტების მიერ ამომრჩეველთა აღრიცხვაში. აღსანიშნავია, რომ არაერთი უბნის ტერიტორიაზე გაურკვეველი სტატუსის პირები შეინიშნებოდნენ".

საია ასევე ყურადღებას ამახვილებს იმ ძალადობის ფაქტებზე, რომლებსაც გუშინ ჰქონდათ ადგილი. მისი თქმით, ასევე დაფიქსირდა საიას წარმომადგენლებისთვის სიტყვიერი შეურაცხყოფისა დ ამომრჩევლის მოსყიდვის ფაქტები.

ნაცვლიშვილმა ასევე განაცხადა, რომ საია რამდენიმე უბნის შედეგების ბათილად ცნობას ითხოვს, მათშორის ერთი თბილისში საბურთალოს რაიონში:

"ვითხოვთ მარნეულის უბნის ბათილობას, რადგან წარმოუდგენელია, რომ იმ ფონზე, რაც მოხდა, ბათილად არ ცნონ ეს შედეგები. ასევე ჯიხაშკარის უბანი უნდა გამოცხადდეს ბათილად. ძალადობის გამოვლინების გამო, კონკრეტული უბნების შედეგები კითხვის ნიშნის ქვეშ დადგა".