რუსთავი 2 ჟურნალისტების უმრავლესობამ დატოვა. ამის შესახებ მათ ახლახან განაცხადეს, ნაწილმა კი ფეისბუქგვერდზე დაპოსტა.

ესენი არიან:

• თამარ ბაღაშვილი;
• ნათია გოგსაძე;
• დავით ქაშიაშვილი;
• ქეთა ციცქიშვილი;
• მაიკო ლომიძე;
• გიგლა თუმანიშვილი;
• ეკო მაღრაძე;
• დავით ერაძე;
• სოფო ზურაბიანი;
• ჯეიჰუნ მუჰამედალი;
• რუსუდან ჯაბანაშვილი;
• ნინო გაზდელიანი;
• თამთა დოლენჯაშვილი;
• ნათია ტრაპაიძე;
• ნინო სამყურაშვილი;
• თაკო სურგულაძე;
• ქეთი ნადიბაიძე;
• ემა გოგოხია.

"ჩემი ხელით არ დაგანგრევინებ ამ ქვეყანას. ერთი წუთი არ ვიმუშავებ შენთვის!" — ამ სიტყვებით დატოვა არხი პოსტ სკრიპტუმის ჟურნალისტმა, მაიკო ლომიძემ.

ჟურნალისტების ნაწილი მადლობას უხდის თანამშრომლებსა და არხს თანადგომისა და გამოცდილებისთვის. ისინი იხსენებენ არხზე გავლილ წლებს და ამბობენ, რომ ბრძოლა გრძელდება.

"ეს არის ჩემი ცხოვრების უმძიმესი გადაწყვეტილება, 14-წლიანი ისტორიის დასასრული, რომელიც ყველაზე მეტად მიყვარს, თავის შეცდომებით და კარგი თუ ცუდი გამოცდილებით. მადლობა ყველას, ჩემო მეგობრებო თქვენთან გატარებული დღეებისთვის! მიყვარხართ და იმედია, კიდევ შევხვდებით", — ამბობს თამარ ბაღაშვილი.

გიგლა თუმანიშვილი წერს, რომ 11 წელი ერთ ყუთში ჩაატია. ის მადლობას უხდის თითოეულ რესპონდენტსა და ამბობს, რომ რჩება იმ ადამიანების გულშემატკივრად, რომლებიც არხზე მუშაობას აგრძელებენ.

"მე წავედი... ხვალ მოვა ის ვინც საბოლოოდ გამორთავს რუსთავი 2-ის ღილაკს, მივა და იტყვის ბედნიერი სახით, რომ მაგარ საქმეებს გააკეთებს, არადა ერთხელ ვიხილეთ მისი მაგარი საქმეები... მისგან განსხვავებით არც ერთი ჩემი სიუჟეტის არ მრცხვენია, არც ერთი ჩემი ნათქვამი სიტყვის არ მერიდება და კიდევ ვიტყვი, რომ რუსეთი ოკუპანტია, დავით გარეჯი საქართველოა, გუგუტიანთკარი ჩვენი ქვეყანაა, საპატრიარქოში პრობლემებია და მთავრობა დაჩმორებულია რუსული გავლენით!" — წერს თუმანიშვილი.

როგორც რუსთავი 2-ის ყოფილმა გენერალურმა დირექტორმა, ნიკა გვარამიამ განაცხადა, მზად არის ისინი მთავარ არხზე დაასაქმოს და ორშაბათიდან ხელშეკრულებების გაფორმებას იწყებს.

გუშინ, 20 აგვისტოს ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

პროტესტის ნიშნად არხიდან წავიდნენ დღის მთავარი საინფორმაციო გამოშვების წამყვანები. არხზე ამ დრომდე არ გასულა საინფორმაციო გამოშვება და ვებგვერდზე არ იდება ნიუსებიც.