მოსამართლე გიორგი კურატიშვილმა მაღალი საზოგადოებრივი ინტერესის საფუძვლითა და ნიკა გვარამიას მოთხოვნით სასამართლო სხდომის გადაღების უფლება ყველა ტელევიზიას მისცა. ამ სხდომაზე მოსამართლე რუსთავი 2-ის ყოფილი დირექტორის, ნიკა გვარამიას აღკვეთის ღონისძიებაზე მსჯელობს.

"მაღალი საზოგადოებრივი ინტერესიდან გამომდინარე შემოვიდეს ყველა, ვისაც სურს", — თქვა მოსამართლემ.

სხდომაზე, რომელსაც პირველი არხი იღებდა, რუსთავი 2-ის დაშვების თხოვნით მოსამართლეს ნიკა გვარამიამ მიმართა.

"პირველი არხი ყველა პოლიტიზირებულ და მნიშვნელოვან პროცესს არ აშუქებს სათანადოდ და ბოროტად იყენებს კანონისმიერ ვალდებულებას. მინდა გთხოვოთ, რომ მე რუსთავი 2-ზე ზიანს მედავებიან, მაგრამ, გთხოვთ, მისცეთ მას უფლება შემოვიდეს და პირდაპირ ეთერში ტრანსლაცია განახორციელოს საქმის მაღალი საჯარო ინტერესის გამო", — ამ სიტყვებით მიმართა გვარამიამ მოსამართლეს.

გუშინ, 9 აგვისტოს პროკურატურამ ნიკა გვარამიას ბრალი წაუყენა. მას არხის დირექტორად მუშაობის დროს საზიანო გადაწყვეტილების მიღებას ედავებიან.

გვარამიას წინააღმდეგ 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ პროკურატურაში საჩივარი შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ისვე აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა. სწორედ ამ საქმეზე აპირებს პროკურატურა ტელევიზიის ყოფილი დირექტორისთვის ბრალის წაყენებას.