რუსთავი 2-ის ინფორმაციით, მოწმეები, რომლებმაც ირაკლი ოქრუაშვილის წინააღმდეგ ჩვენება მისცეს, სამართალდამცველები არიან. კურიერმა გაასაჯაროვა საქმეში არსებული ჩვენებები, რომლებიც 23-24 ივლისით თარიღდება.

რუსთავი 2-ის ცნობით, ოქრუაშვილის წინააღმდეგ ერთ-ერთი მთავარი მოწმე კრიმინალური პოლიციის თანამშრომელი ბაკურ გერგენიძეა, რომელიც ჩვენებაში წერს, რომ მას პირადად ესმოდა როგორ მოუწოდებდა მასთან ერთად მყოფ პირებს პარლამენტში შეჭრისკენ.

"ოქრუაშვილის წინააღმდეგ ჩვენება აქვს მიცემული განსაკუთრებულ დავალებათა დეპარტამენტის თანამშრომელს თემურ კვინიკაძესაც. სპეცრაზმელი გამოკითხვის ოქმში ორგანიზებულ ჯგუფზე საუბრობს, რომელიც აქციაზე პოლიციას ფიზიკურად უსწორდებოდა. მხოლოდ ჩვენების ბოლოს ახსენებს ოქრუაშვილს, ამბობს რომ ის მომიტინგეთა შორის დაინახა, თუმცა ოპოზიციური პარტიის ლიდერის მიერ ძალადობრივი გზით პარლამენტში შესვლის შესახებ მოწოდება არ გაუგია", — განაცხადეს კურიერში.

გამარჯვებული საქართველოს თანადამფუძნებელმა ანა რეხვიაშვილმა რადიო თავისუფლებას უთხრა, რომ საქმეში ოქრუაშვილის წინააღმდეგ დევს ერთი ვიდეო და ჩვენებები, რომლებიც პოლიციელებს ეკუთვნით.

On.ge დეტალების დასაზუსტებლად საქართველოს პროკურატურას დაუკავშირდა და მათ პასუხს ამ დრომდე ველოდებით.

თბილისის საქალაქო სასამართლომ 20 ივნისის აქციის საქმეზე ირაკლი ოქრუაშვილს აღკვეთის ღონისძიებად პატიმრობა შეუფარდა.

შინაგან საქმეთა სამინისტრომ თავდაცვის ყოფილი მინისტრი ირაკლი ოქრუაშვილი 20 ივნისის საქმეზე დააკავა. მას ჯგუფური ძალადობა ედება ბრალად. ოპოზიცია ოქრუაშვილის დაკავებას პოლიტიკურ რეპრესიებს უწოდებს.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 17 პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.