საარჩევნო ბლოკის, პაატა ბურჭულაძე-სახელმწიფო ხალხისთვის წარმომადგენლებმა, გვიან ღამით საგანგებო ბრიფინგი გამართეს. ბლოკის ლიდერებმა, გივი თარგამაძის ავტომობილის აფეთქებასთან დაკავშირებით განცხადება გაავრცელეს და შესაბამის ორგანოებს მოუწოდეს, არჩევნებამდე გამოიძიონ ეს ფაქტი.

პაატა ბურჭულაძის განცხადებით, მომხდარზე პასუხისმგებლობა ხელისუფლებას ეკისრება:

„ეს არის ტერაქტი, ასეთი ტერაქტი საქართველოში არ მომხდარა 90-იანი წლების შემდეგ. პასუხისმგებლობა სრულად ეკისრება ხელისუფლებას. ჩვენ მოვითხოვთ, სასწრაფოდ გაიხსნას ეს ტერაქტი. არჩევნებამდე უნდა გაიხსნას ეს ტერაქტი.“

4 ოქტომბერს, საღამოს, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. შემთხვევის შედეგად დაშავდა 5 ადამიანი, მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.

ფაქტს ქვეყნის წინააღმდეგ მიმართული დივერსია უწოდა პრემიერმინისტრმა გიორგი კვირიკაშვილმა. მან პირობა დადო, რომ შემთხვევას გამოიძიებენ და "ვერცერთ დამნაშავეს ვერ დაიცავს ვერანაირი იმუნიტეტი, ან სხვა ქვეყნის მოქალაქეობა".