"ირაკლი ოქრუაშვილი მომავლის პოლიტიკოსი არ არის, წარსულთან ოპონირებას კი არ ვაპირებთ", — ასე გამოეხმაურა პარლამენტის თავმჯდომარე ყოფილი თავდაცვის მინისტრის დაკავებას. მისი თქმით, ალოგიკურია იმაზე საუბარი, რომ ოქრუაშვილის პოლიტიკური ნიშნით დააკავეს.

თალაკვაძის შეფასებით, სახელმწიფოს მართვის ის მეთოდები, რაზეც ოქრუაშვილი საუბრობდა, სრულიად მიუღებელია.

"ის საუბრობდა როგორ ურთიერთობდნენ ხელისუფლებაში ყოფნის დროს ბიზნესთან. ის და მისი მეგობრები, საიდან ახდენდნენ ფულის მობილიზაციას, როგორ ხდებოდა, სავარაუდოდ, ფულის გათეთრება და სხვა ადამიანების გამოყენებით, აქტივების გადაფორმება, როგორ ხდებოდა არაფორმალური მოლაპარაკებები პრეზიდენტის კარზე და როგორ მიიღებოდა გადაწყვეტილებები. ამ ყველაფრის შემდეგ რა პოლიტიკურ მოტივაციაზეა საუბარი?!" — განაცხადა მან ტელეკომპანია იმედის ეთერში.

შინაგან საქმეთა სამინისტრომ თავდაცვის ყოფილი მინისტრი ირაკლი ოქრუაშვილი 20 ივნისის საქმეზე დააკავა. მას ჯგუფური ძალადობა ედება ბრალად. ოპოზიცია ოქრუაშვილის დაკავებას პოლიტიკურ რეპრესიებს უწოდებს.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 17 პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.