საქართველოს ინოვაციების და ტექნოლოგიების სააგენტომ ზუგდიდში ტექნოლოგიური პარკი გახსნა, სადაც წარმოდგენილი იქნება როგორც სამრეწველო ინოვაციების უნივერსალური ლაბორატორია, ისე სასწავლო და co-working ცენტრები, საკონფერენციო დარბაზი, კომპანიებისთვის ერთობლივი სამუშაო ადგილები, რეკრეაციული სივრცე და სხვა.

ვიცეპრემიერის, დიმიტრი ქუმსიშვილის განცხადებით, აღნიშნული ტექნოპარკი იმაზე უფრო ახალი ტექნიკითაა აღჭურვილი, ვიდრე თბილისის ტექნოლოგიური პარკია:

"700 კვ.მ. ფართის შენობა ნაგებობები დღეს მთლიანად არის გახსნილი სივრცე, გახსნილი ცოდნისთვის, სიახლეებისთვის, ინოვაციებისთვის, ჩვენი ბავშვებისთვის და ახალგაზრდებისთვის. მოხარული ვარ, რომ დღეიდან ზუგდიდელებს და ყველას დასავლეთ საქართველოში აქვს შესაძლებლობა მიიღოს ყველა ის სერვისი და მომსახურება, რომელიც თბილისის ტექნოპარკში გვაქვს. სივრცე არის გახსნილი, მომსახურებები არის აბსოლუტურად უფასო".

ზუგდიდის ტექნოპარკი მოიცავს ისეთ ინოვაციურ სერვისებსა და სივრცეებს, როგორებიცაა FabLab-სერვისები: მოდელირება, მატერიალიზაცია, ტრენინგები, კონსულტაციები, სტადი ტური, საერთო სამუშაო სივრცე ძლიერი კომპიუტერული ტექნიკით.

ამასთან, აღნიშნულ ტექნოპარკში ჩატარდება პროგრამირების, დიზაინის, მეწარმეობის და სხვადასხვა ბიზნეს მიმართულებების ტრენინგები. ამას გარდა, აქცენტი გაკეთდება დისტანციური სწავლების მეთოდოლოგიაზე, ტექნოპარკის ყველა ღონისძიება პირდაპირი ეთერით ინოვაციის ცენტრებში გადაიცემა, შესაბამისად მსურველებს საშუალება ექნებათ ვირტუალურად დაესწრონ ყველა ღონისძიებას, დასვან კითხვები და მაქსიმალურად ჩაერთონ პროცესში.

ინოვაციების და ტექნოლოგიების სააგენტოს თავმჯდომარის, ირაკლი ქაშიბაძის განმარტებით, საქართველოსთვის დღეს ერთ-ერთ მნიშვნელოვან პრიორიტეტად დგას ქვეყნის ტექნოლოგიური განვითარება:

"ეს მიმართულება მთვარობის 4 პუნქტიანი გეგმის ერთ-ერთი მნიშვნელოვანი პუნქტია. საქართველოს ინოვაციებისა და ტექნოლოგიების საააგენტო და ტექნოპარკი სწორედ ამ გეგმის ფარგლებში შეიქმნა, და იმ მიზანს ემსახურება, რასაც ქვეყნის მასშტაბით ეკონომიკური მაჩვენებლის განვითარება ჰქვია. ტექნოლოგიურ პარკში ჩვენ ვცდილობთ ჩვენი საქმიანობით მივუახლოვდეთ მსოფლიო მასშტაბებს და დავიმკვიდროთ თავი. გახდეთ საინტერესო უცხოური ინვესტიციებისათვის და განვავითაროთ ქვეყანაში ბიზნეს სექტორი, რაც პირდაპირ აისახება ქვეყნის ეკონომიკაზე".

ზუგდიდში ტექნოლოგიური პარკი გაიხსნა, 3 ოქტომბერი, 2016.

ფოტო: ინოვაციებისა და ტექნოლოგიების სააგენტო