პარლამენტის დეპუტატს, ზაქარია ქუცნაშვილს მიაჩნია, რომ 20-21 ივნისის აქციის მთავარი მიზანი ძალაუფლების ხელში ჩაგდება იყო. რუსთავი 2-თან საუბარში დეპუტატი ამბობს, რომ აქციის დროს განვითარებულ მოვლენებზეც პასუხისმგებლობა ოპოზიციას ეკუთვნის, რადგან მათ ძალადობრივი შინაარსის მოწოდებები გააჟღერეს.

"სრულად პასუხისმგებლობა განვითარებულ მოვლენებზე ეკისრება უპასუხისმგებლო ოპოზიციას, რომელმაც უბიძგა მოქალაქეებს იმ ძალადობისკენ, რა ძალადობაც ჩვენ ვიხილეთ მთელი საათების განმავლობაში. ასე, რომ პასუხისმგებლობა პოლიციის რეაქციაზე თავიდან ბოლომდე აქვს ინსპირატორებს, ვინც გაუკეთა ინსპირირება ამ ძალადობას. გამოდის წინა პლანზე არა სახელმწიფოს პასუხისმგებლობა, არამედ პოლიციელების ინდივიდუალური პასუხისმგებლობა, რომელი იქცეოდა პროპორციული ძალის გამოყენების ფარგლებში და რომელი გასცდა პროპორციული ძალის ფარგლებს. სახელმწიფო პირნათელია თავის მოქალაქეებთან, ცალკეული გადაცდომები იყო და ამაზე არავინ მალავს", — აღნიშნა დეპუტატმა.

მისივე თქმით, შს მინისტრი გიორგი გახარია კანონის შესაბამისობით მოქმედებდა და იცავდა სახელმწიფო ინსტიტუტებს:

"თქვენ ფიქრობთ, ან ვინმე ფიქრობს, რომ დანაშაულის ფაქტის დანახვის შემთხვევაში პოლიციელმა ზემდგომს უნდა დაურეკოს და შეუთანხმოს, რომ გამომიგზავნე წერილობითი თანხმობა ან სიტყვიერი ბრძანება, რომ დანაშაული აღვკვეთო, ძალიან ცდებით".

გარდა ამისა, ზაქარია ქუცნაშვილი ამბობს, რომ რუსი დეპუტატები საქართველოში მიმდინარე მოვლენებზე დიდი ხნის განმავლობაში ისაუბრებენ და ამ მოცემულობის შეცვლა მხოლოდ საერთაშორისო ინსტრუმენტებით შეიძლება.

მშვიდობიანი გზით, მოლაპარაკების გზით ოკუპაციის დაძლევა და არა ომის გზით. თუ ვინმეს ჰგონია, რომ აქციით ან მიტინგით პრობლემა გადაწყდება, სულ მცირე გულუბრყვილოა, შესაბამისად ყველა უნდა დაფიქრდეს, თუ რა იყო 20-21 ივნისის აქციის მიზანი", — განაცხადა დეპუტატმა.

პარლამენტში მართლმადიდებლობის საპარლამენტთაშორისო ასამბლეის ჩატარებას პროტესტი მოყვა, რადგან მას რუსეთის დუმის დეპუტატი სერგეი გავრილოვი უძღვებოდა, რომელიც პარლამენტის თავმჯდომარის სკამზე დაჯდა. ოპოზიციური პარტიების კრიტიკის გარდა, მთავრობა და თავად ღონისძიების ორგანიზატორი ზაქარია ქუცნაშვილი საზოგადოების მწვავე კრიტიკის ობიექტიც გახდა.

პროტესტის შემდეგ ქუცნაშვილმა დეპუტატის მანდატის დატოვება გადაწყვიტა. ამ დროისთვის ქუცნაშვილს მანდატი ოფიციალურად დატოვებული არ აქვს.