ჩრდილოეთ კორეის ლიდერის, კიმ ჩენ ინის ნახევარძმა კიმ ჩენ ნამი, სავარაუდოდ, აშშ-ს ცენტრალური სადაზვერვო სააგენტოს ინფორმატორი იყო. ინფორმაციას ამის შესახებ Wall Street Journal წყაროზე დაყრდნობით ავრცელებს. კიმ ჩენ ნამი 2017 წელს მალაიზიაში მოკლეს. სწორედ ის განიხილებოდა მამამისის, კიმ ჩენ ირის შემცვლელად.

როგორც წყარო ამბობს, კიმ ჩენ ნამი მალაიზიაში სწორედ სადაზვერვო სააგენტოს წარმომადგენელთან შესახვედრად ჩავიდა, თუმცა შესაძლოა, ეს ერთადერთი მიზეზი არ ყოფილა. გამოცემის ინფორმაციით, აშშ-ს რამდენიმე ყოფილმა თანამდებობის პირმა განაცხადა, რომ კიმ ჩენ ნამი სხვა ქვეყნების უსაფრთხოების სამსახურებთან კონტაქტობდა, განსაკუთრებით ჩინეთთან.

კიმ ჩენ ინის ნახევარძმა, კიმ ჩენ ნამი 2017 წლის 13 თებერვალს კუალა-ლამპურის აეროპორტში მოკლეს. პოლიციამ მის კანზე ნერვო-პარალეპტიკური ნივთიერება VX აღმოაჩინა. კიმ ჩენ ნამის მკვლელობის ბრალდებით ინდონეზიისა და ვიეტნამის მოქალაქე ორი ქალი დააკავეს.

გამოძიების ინფორმაციით, ქალებმა აეროპორტში კაცს სახეზე ნაჭერი ააფარეს, რომელიც ქიმიური ნივთიერებით იყო გაჟღენთილი. ქალები ბრალს არ აღიარებენ. სასამართლო პროცესზე ბრალდებულები ამბობდნენ, რომ არ იცოდნენ საწამლავს შესახებ და დარწმუნებულები იყვნენ, რომ კომედიურ შოუში მონაწილეობდნენ, რომლისთვისაც მათთვის უცნობმა პირმა შეარჩია. ინდონეზიის მოქალაქეს მალაიზიის პროკურატურამ ბრალი 2019 წლის მარტში მოხსნა. რაც შეეხება ვიეტნამელი ქალს, აპრილში მას სამი წლითა და ოთხი თვით თავისუფლების აღკვეთა მიუსაჯეს, თუმცა ერთ თვეში ვადამდე ადრე გაათავისუფლეს.