შინაგან საქმეთა სამინისტროს განცხადებით, საქართველოს ბანკისა და თიბისი ბანკის ვიზუალურად მსგავსი ვებგვერდებით მოქალაქეებისთვის თანხის მოტყუებით დაუფლების ბრალდებით სამი პირი დააკავეს. ბრალდებულებიდან ორი თურქეთის, ხოლო ერთი საქართველოს მოქალაქეა.

დაკავებულებს ბრალად ედებათ კომპიუტერულ სისტემაში უნებართვო შეღწევა, კომპიუტერული მონაცემების უკანონოდ გამოყენება, კერძო კომუნიკაციების საიდუმლოების დარღვევა და ქურდობა. აღნიშნული ბრალდება 2-დან 10 წლამდე ვადით თავისუფლების აღკვეთას ითვალისწინებს.

გამოძიების ინფორმაციით, აღნიშნული პირები ფეისბუქზე რეკლამის სახით სისტემატურად ათავსებდნენ ვებგვერდებს, რომლებიც ვიზუალურად ჰგავდა საქართველოს ბანკისა და თიბისი ბანკის ინტერნეტ-ბანკინგის ვებგვერდებს.

"აღნიშნული ვებ-გვერდების მეშვეობით, ხდებოდა ფეისბუკის მომხმარებლებისთვის სხვადასხვა სახის ინტერნეტმომსახურების შეთავაზება. გარდა ამისა, მომხმარებლების მოზიდვის მიზნით, აღნიშნული ვებგვერდებიდან ვრცელდებოდა ცრუ ინფორმაცია, თითქოსდა ბანკი ათამაშებდა სხვადასხვა სახის ძვირადღირებულ პრიზებს", — განაცხადა ცენტრალური კრიმინალური პოლიციის დეპარტამენტის დირექტორის მოადგილე მამუკა ჭელიძემ.

მისივე თქმით, აღნიშნული ქმედებით ამ პირებმა მოქალაქეებს 200 000 ლარამდე ფინანსური ზიანი მიაყენეს. გამოძიების განმარტებით, დაკავებული პირები თანხებს მათ მიერ სხვადასხვა ბანკისა და ინტერნეტ-ტოტალიზატორების წინასწარ შექმნილ ანგარიშებზე რიცხავდნენ და მართლსაწინააღმდეგოდ ითვისებდნენ.

უწყების ინფორმაციით, დაკავებულების საცხოვრებელ სახლში, დროებით საცხოვრებელ ბინასა და სასტუმროს ნომერში ჩატარებული ჩხრეკის შედეგად, ნივთმტკიცებად ამოიღეს 3 ლეპტოპი, 4 მობილური ტელეფონი, ერთი ცალი პერსონალური კომპიუტერი, რამდენიმე საბანკო პლასტიკური ბარათი და ფული.

გამოძიება საქართველოს სისხლის სამართლის კოდექსის 177-ე მუხლის მე-2 ნაწილის "ა" და მე-4 ნაწილის "ა" ქვეპუნქტებით, 284-ე მუხლის მე-2 ნაწილის "ა" ქვეპუნქტით, 285-ე მუხლის მე-2 ნაწილის "ა" ქვეპუნქტით და 158-ე მუხლის 1-ლი ნაწილით მიმდინარეობს.