ბათუმის სახელმწიფო უნივერსიტეტის უკვე ყოფილი ლექტორი, ომარ მახარაძე, რომელიც სტუდენტმა სექსუალურ შევიწროებაში დაადანაშაულა, ამბობს, რომ მას პროვოკაცია მოუწყვეს. ამის შესახებ მან გამოკითხვიდან გამოსვლის შემდეგ განაცხადა.

"ეს პროვოკაცია გარკვეული პერიოდის განმავლობაში მზადდებოდა, მიმდინარეობს საგამოძიებო მოქმედებები. არსებობს, რა თქმა უნდა, მაღალი საზოგადოებრივი ინტერესი. მე ვფიქრობ, რომ არაფერი არ იკვეთება დანაშაულებრივი. დადგინდება ობიექტური ჭეშმარიტება", — ამბობს ომარ მახარაძე.

მისივე თქმით, ადამიანთან გარკვეულ ჯგუფს მიზანმიმართულად სურდათ მისი და მისი ოჯახის დისკრედიტაცია.

"სურდათ ჩამოვეშორებინე საუნივერსიტეტო და პოლიტიკურ საქმიანობას. მე ამას ვგრძნობდი კიდევაც... მე პროფესორი კაცი ვარ, არ დავარღვევ არცერთი ადამიანის უდანაშაულობის პრეზუმციას ჩემი ოპონენტებისგან განსხვავებით, რომელბმაც ცილისმწამებლური, ძალიან ბინძური, შეურაცმყოფელი სკანდალი ამიგორეს", — განუცხადა მახარაძემ ჟურნალისტებს.

სტუდენტმა ლექტორი სექსუალური ხასიათის მიმოწერასა და შევიწროებაში გამოცემა ბათუმელებთან დაადანაშაულა. სტუდენტი ამბობს, რომ მას ამის დამადასტურებელი მიმოწერა და ფოტოსურათები აქვს. შინაგან საქმეთა სამინისტრომ გამოძიება 150-ე მუხლით დაიწყო, რაც იძულებას გულისხმობს. თუმცა, მოგვიანებით მუხლი დამძიმდა და გამოძიება 139-ე მუხლით მიმდინარეობს, რაც სექსუალური ხასიათის ქმედების იძულებას გულისხმობს.

ომარ მახარაძე ამავე დროს ბათუმის საკრებულოს წევრია. საკრებულოს განცხადებით, მახარაძემ იურიდიულ და საპროცედურო საკითხთა კომისიის თავმჯდომარის თანამდებობა და ფრაქცია ქართული ოცნება - მრეწველების რიგები დატოვა. გარდა ამისა, უნივერსიტეტმა მასთან ხელშეკრულება შეწყვიტა.