ცენტრალური საარჩევნო კომისია ოპოზიციის ბრალდებებს პასუხობს და განმარტავს, რატომ შეიტანეს ზუგდიდის ოლქში წინასწარ საარჩევნო ინვენტარი. მათი თქმით, ამ ოლქში უბნების რაოდენობის მიხედვით დოკუმენტაციის გადაცემა რამდენიმე დღეზეა განაწილებული. მათივე თქმით, ეს პროცესი ასეთ სახეს ატარებს ყოველი არჩევნების დროს, არა მხოლოდ ზუგდიდში, არამედ სხვა საარჩევნო ოლქებშიც.

ცესკოს განმარტებით, კანონის შესაბამისად, სიების საბოლოო ვერსიის (მათ შორის სამაგიდო ვერსიის) გადაცემა უნდა მოხდეს კენჭისყრის დღემდე არაუგვიანეს მეორე დღისა ( ანუ, ამ შემთხვევაში 17 მაისამდე). მათი მტკიცებით, საუბნო საარჩევნო კომისიებისთვის გადაცემული ბეჭდები დალუქულია კანონის შესაბამისად და მხოლოდ კანონით განსაზღვრულ დროს გაიხსნება.

ცესკოში ამბობენ, რომ ეს საკითხი "სპეკულაციის საგანი" გახდა და საზოგადოების შეცდომაში შეყვანა სცადეს, ამიტომ მიიღეს გადაწყვეტილება სამაგიდო სიები და ბეჭდები უკან, საოლქო კომისიაში დააბრუნონ და მოგვიანებით, ბიულეტენებთან ერთად გადასცენ უბნებს. გარდა ამისა, ცესკოს თქმით, ეჭვისა და ინტერპრეტაციების გამოსარიცხად, ზუგდიდის ოლქში საუბნო საარჩევნო კომისიების რეგისტრატორების ბეჭდებს მთლიანად შეცვლიან.

გუშინ, 14 მაისს გაერთიანებულმა ოპოზიციამ ზუგდიდში საპროტესტო აქცია გამართა და N67-ე საოლქო საარჩევნო კომისიის თავმჯდომარის, მირანდა მესხის გადაყენებას მოითხოვა. ოპოზიციის წევრები ამბობდნენ, რომ საარჩევნო უბნებზე სამაგიდო სიები, საარჩევნო ბეჭდები და ლუქები კანონდარღვევით არჩევნებამდე ხუთი დღით ადრე გაიგზავნა. ისინი მოითხოვდნენ, რომ ოლქში თბილისიდან ახალი ბეჭდები გაეგზავნათ.

19 მაისს ზუგდიდში მერის ასარჩევად შუალედური არჩევნები ჩატარდება.